ربندرناتھ نے ہی بھارت کا قومی ترانہ لکھا تھا

سینیئر پولیس افسر ربندرناتھ سرکار نے بی بی سی کو بتایا کہ گرفتار کئے جانے والوں میں سے دو افراد ربندر بھون میں ملازم تھے جہاں سے گزشتہ ہفتے یہ اعزازات چرائے گئے تھے۔

انہوں نے مزید کہا کہ بربھم، نادیہ اور مرشدآباد نامی ملحقہ اضلاع سے سولہ دیگر افراد کو بھی پوچھ گچھ کی غرض سے حراست میں لیا گیا ہے۔

بھارت کی وفاقی تحقیقاتی ایجنسی سی بی آئی نے بھی اس معاملے کی چھان بین کا آغاز کر دیا ہے۔

بھارتی وزیراعظم اٹل بہاری واجپئی دو اپریل بروز جمعہ شانتی نکیتن کا دورہ کرنے والے ہیں جہاں ربندر بھون واقع ہے۔

اس سے پہلے پولیس نے بتایا تھا کہ ربندرناتھ ٹیگور کے نوبیل تمغے اور اعزازی سرٹیفکیٹ سمیت ان کی گھڑی، سونے کی انگوٹھی، قیمتی پینٹنگز اور مزید چند چیزیں چوری ہوگئی تھیں۔

پولیس کے مطابق یہ تمغہ اور سرٹیفکیٹ اس عمارت سے چوری ہوئے تھے جہاں بنگالی شاعر ربندرناتھ ٹیگور رہائش پذیر تھے۔ شانتی نکیتن کے قصبہ میں اتریان نامی کمپلکس میں جہاں ٹیگور کا گھر تھا اور اب وشوا بھارتی یونیورسٹی بھی قائم ہے، ایک عجائب گھر قائم کیا گیا تھا۔

پولیس نے شبہہ ظاہر کیا تھا کہ یہ کارروائی ان افراد میں سے کسی کی ہے جو اس عجائب گھر کا دورہ کرنے آئے تھے۔ یہ عجائب گھر ربندرناتھ ٹیگور کے لئے مختص ہے۔

پولیس کو یہ شک بھی تھا کہ خالی شو کیس کی نشاندہی کرنے والوں ہی میں وہ مشتبہ شخص بھی شامل ہے جس نے چوری کی ہے۔

عجائب گھر سمیت یونیورسٹی کو عام لوگوں کے لئے منگل کی سہ پہر بند کیا گیا تھا اور ان اشیاء کی چوری کا علم جمعرات کی صبح ہوا۔ پولیس انسپکٹر جنرل کے مطابق یہ چوری اس درمیانی عرصے میں کی گئی تھی۔

رابندر ناتھ ٹیگور بھارت کی معروف ترین ادبی شخصیت مانے جاتے ہیں اور انہیں انیس سو تیرہ میں ان کے مجموعے گیتا نجلی کےلئے نوبیل پرائز دیا گیا تھا۔

انہوں نے بھارت کا قومی ترانہ لکھنے کے علاوہ وشوا بھارتی یونیورسٹی بھی قائم کی تھی۔

رابندر ناتھ کا انتقال انیس سو اکتالیس میں ہوا۔ ان کی عمر اسّی برس تھی۔