معائنے کے دوران شٹل خلائی سٹیشن سے 46 میل کے فاصلے پر رہے گی

شٹل پر چھ خلا باز سوار ہیں جبکہ ساتواں جرمن خلا باز تھومس ریٹرز چھ ماہ کی مہم کے لیئے آئی ایس ایس پر ہی رکے گا۔

زمین پر واپسی کا سفر شروع کرنے سے قبل خلا باز ڈسکوری کا مکمل معائنہ کریں گے تاکہ شٹل کی تباہی کے کسی بھی ممکنہ خطرے کو دور کیا جاسکے۔

معائنے کے دوران شٹل خلائی سٹیشن سے 46 میل کے فاصلے پر رہے گی تاکہ کسی خرابی کے پائے جانے کی صورت میں اسے واپس سپیس سٹیشن پر لے جایا جاسکے۔

پروگرام کے مطابق ڈسکوری پیر کو امریکہ کے کینیڈی سپیس سینٹر پر لینڈ کرے گی۔

یہ مشن 2003 میں کولمبیا شٹل کی تباہی کے بعد پہلا مشن ہے۔ کولمبیا زمین پر واپسی کے سفر کے دوران تباہ ہوگئی تھی اور اس پر سوار تمام سات افراد ہلاک ہوگئے تھے۔

تحقیقات سے سامنے آیا تھا کہ کولمبیا کی تباہی کی وجہ اس کے فیول ٹینک سے الگ ہونے الا ایک فوم کا ٹکڑا تھا جو شٹل کے پر سے جاٹکرایا تھا۔

ڈسکوری کی لانچنگ سے قبل اس کے معائنے پر کوئی خرابی سامنے نہیں آئی تھی اور خلا باز پر اعتماد ہیں کہ اب بھی ایسا ہی ہوگا اور یہ باحفاظت زمین پر پہنچ سکے گی۔

خلا میں نو روزہ مشن کے دوران تین مرتبہ سپیس واک یا خلا میں چہل قدمی اور خلائی سٹیشن کی مرمت کی گئی ہے۔

ڈسکوری کی پرواز کا مقصد اس حفاظتی نظام کا تجربہ کرنا ہے جو خلائی شٹل کولمبیا کے تباہ ہوجانے کے بعد نافذ کیا گیا ہے۔