نادیہ پرویز بی بی سی اردو ڈاٹ کام، دِلی

سچن تندولکر چوٹ کے باوجود آسٹریلیا کے خلاف کھیلے تھے

دسمبر میں بنگلہ دیش کے دورے کے بعد سچن اپنی کہنی کی چوٹ کے سبب کرکٹ نہیں کھیل سکے تھے۔

حیدرآباد میں ایک نیوز کانفرنس سے خطاب کرتے ہوئے سچن نے کہا ’میں کھیلنے کے لیے بالکل فٹ محسوس کر رہا ہوں اور اسی وجہ سے یہاں ہوں۔ مجھے دیکھنا ہے کہ میں میدان میں کس طرح کھیلوں گا۔ یہ تو کوئی بھی نہیں جانتا کہ میدان میں کیا ہوگا لیکن میں کھیلنے کے لیے تیار ہوں۔‘

گزشتہ سال اکتوبر میں تندولکر نے اپنی چوٹ کے باوجود آسٹریلیا کے خلاف میچ کھیلا تھا۔ اس کے بعد 2005 کے آغاز میں تکلیف شدید ہو جانے کے سبب ڈاکٹروں نے انہیں 6 ہفتوں کے لیے کا آرام کرنے کی ہدایت کی تھی۔

گزشتہ دو برس سے تندولکر کی صحت پوری طرح ٹھیک نہ ہونے کی وجہ سے انہیں بیشتر اوقات کرکٹ گراؤنڈ سے دور رہنا پڑا ہے۔ انہیں مختلف اوقات میں کمر، ٹخنے، انگلیوں اور ایڑھیوں میں درد کی شکایت رہی ہے۔

پاک ہند سیریز کا آغاز آئندہ مہینے کی تین تاریخ سے ہو رہا ہے۔ پاکستانی ٹیم 6 برس کے وقفے کے بعد ہندوستان کا دورہ کر رہی ہے۔ اس سیریز کے دوران چھ ایک روزہ اور تین ٹیسٹ میچ کھیلے جائیں گے۔

گزشتہ برس جب ہندوستانی ٹیم پاکستان گئی تھی تب ہندوستان نے ٹیسٹ سیریز 2-1 اور ایک روزہ میچ کی سیریز 3-2 سے جیتی تھی۔

دوسری جانب پاکستانی ٹیم کے فاسٹ بولر شعیب اختر بھی اپنی چوٹ کے سبب ہندوستان نہیں آ رہے ہیں۔

اس سیریز کے متعلق سچن کہتے ہیں ’ کسی بھی سیریز سے پہلے تناؤ اور دباؤ تو ہوتا ہی ہے خاص کر جب سیریز ہندوستان اور پاکستان کے درمیان ہو۔ اور میں دباؤ میں بہتر پرفارم کرتا ہوں۔‘

گراؤنڈ پر سچن کی واپسی پر ہندوستان اور پاکستان دونوں ہی جگہ شائقین خوشی کا اظہار کر رہے ہیں لیکن وہ پاک ہند سیریز میں شعیب اختر کی کمی بہت شدت سے محسوس کریں گے۔