Spòrs

Thig seusan a' bhuill-choise ionadail gu ceann Disathairne nuair a chluicheas Iar-Thuath an Eilein Sgitheanaich an aghaidh Mhalaig sa gheama mu dheireadh ann an Lìog Thaobh Siar na Gàidhealtachd.

Tha cha mhòr dà mhìos ann bho bhuannaich Malaig an tiotal ach tha dàil air a dhol air a' gheama seo is an Iar-Thuath - a chrìochnaicheas san dàrna àite às bith dè thachras - air a bhith trang ann an Cupa Amaitearach na h-Alba.

Rinn iad an gnothach air Bon Accord City air breaban-peanais ann an Obar Dheathain às dèidh dha na sgiobaidhean a bhith co-ionnan 3-3.

Bha a' chiad gheama eatorra san Eilean Sgitheanach air crìochnachadh 2-2.

• Malaig a' buannachadh Lìog Taobh Siar na Gàidhealtachd

Bha an Iar-Thuath an uairsin co-ionnan 3-3 ann am Port Rìgh san ath chuairt an aghaidh St Anthony's, mus do chaill iad 5-0 ann an Glaschu.

Bha briseadh-dùil eile ann dhaibh Disathairne nuair a rinn Caol Àcain an gnothach orra 5-3 air breaban-peanais is na sgiobaidhean air crìochnachadh co-ionnan 2-2 sa chuairt dheireannaich de Chupa Eòghainn MhicRath.

Ged a tha Malaig air a bhith nan tàmh nuair a bha sin uile a' tachairt, bidh iad fhèin gu mòr ag amas air an geama a bhuannachadh is an seusan a chrìochnachadh gun puing idir a leigeil seachad san lìog.

Tha dùil gun tèid an geama air adhart ann an Ùige aig 11:30m.

Tùs an deilbh, Camanachd na Camanachd

'S e Ruairidh Ceannadach à Baile Ùr an t-Slèibh an caiptean a bhios aig sgioba nam fear aig Alba nuair a chluicheas iad an aghaidh na h-Èireann ann an Corcaigh Disathairne.

Tha an Ceannadach, 34, air a bhith na phàirt air leth cudromach do loidhne-dìon a' Bhaile Ùir thairis air iomadh bliadhna is e air na duaisean mòra uile ann an iomain a bhuannachadh leis a a' chluba.

Aig ìre phearsanta bhuannaich e cuideachd Bonn Albert Mhic a' Ghobhainn mar shàr-chluicheadair cuairt dheireannach Chupa na Camanachd ann an 2019.

"Tha mi air mo dhòigh a bhith nam phàirt de sguad cho tàlantach agus 's e fìor urram a th' ann a bhith nam sgiobair," thuirt e.

"'S e an-còmhnaidh geama gu math farpaiseach a th' ann an aghaidh nan Èireannach ach tha sinn air trèanadh còmhla gu math anns na seachdainean mu dheireadh is tha sinn deiseil is deònach a dhol an sàs Disathairne."

Chaidh Rona Stiùbhart aig Bàideanach ainmeachadh mar-tha mar chaiptean air sgioba nam ban.

Bidh an dà gheama aig Páirc Uí Chaoimh ann an Corcaigh Disathairne, na boireannaich aig 4f is na fir aig 6f.

Chithear iad air YouTube TG4, taobh a-muigh.

Tùs an deilbh, Comann Camanachd nam Ban

Chaidh Rona Stiùbhart ainmeachadh mar chaiptean air sgioba nam ban aig Alba 'son a' gheama iomain eadar-nàiseanta ann an Corcaigh Disathairne.

Tha Rona air a bhith na pàirt den sgioba aig Bàideanach a bhuannaich air an t-seusan seo a' Phrìomh Lìog, Cupa Valerie Fhriseil is Cupa ùr na Prìomh Lìge.

'"S e urram mòr a th' ann a bhith nam sgiobair," thuirt Rona.

"Tha buidheann gu math làidir againn is tha mi air mo dhòigh a bhith os on cionn".

Thèid boireannaich na h-Alba an aghaidh na h-Èireann aig Páirc Uí Chaoimh aig 4f.

Bidh geama nam fear ann an uairsin aig 6f.

Tha an dà sguad mar a chaidh ainmeachadh an seo, taobh a-muigh.

Tha atharrachadh ann am buidheann nam fear is Alasdair MacIlleathain aig Gleann Urchadain a' tighinn a-steach an àite Chaluim Ghrannd aig Ceann a' Ghiùthsaich is esan air a ghoirteachadh.

Bidh na geamaichean air an craoladh beò air YouTube TG4, taobh a-muigh.

Tha Ceann a' Ghiùthsaich ann an suidheachadh làidir 'son grèim a chumail air tiotal na Prìomh Lìge às dèidh dhaibh a' chùis a dhèanamh air na nàbaidhean aca Baile Ùr an t-Slèibh Disathairne.

Bha am Baile Ùr feumach air puing aig an Dell gus an tiotal a bhuannachadh iad fhèin is chaidh iad air thoiseach le tadhal bho Chonor Jones às dèidh 33 mionaidean.

Bha buille ann dhaibh cha mhòr sa bhad nuair a chaidh Jones a chur far na pàirce.

Bha Ceann a' Ghiùthsaich co-ionnan tràth san dàrna leth tro Lee Bain, is chuir an sgiobair aca Ruairidh MacAnndrais iad an uairsin 2-1 air thoiseach le 17 mionaidean air fhàgail.

Sin mar a chrìochnaich an geama - is le càirt dhearg eile do Struan Ros aig a' Bhaile Ùr anns na mionaidean mu dheireadh - is làmh an uachdair a-nise aig Ceann a' Ghiùthsaich san rèis.

• Ceann a' Ghiùthsaich air Cupa na Camanachd a bhuannachadh

Tha seusan a' Bhaile Ùir ullamh is iad aig an ìre seo ceithir puingean air thoiseach air Ceann a' Ghiùthsaich aig mullach na lìge.

Thèid Ceann a' Ghiùthsaich seachad orra ge-tà, ma 's e is gum buannaich iad an dà gheama a tha air fhàgail aca.

Bidh iad an aghaidh Loch Abair an ath-sheachdain is an uairsin Ceann Loch Seile air an t-seachdamh là den t-Samhain.

Ged a rinn an droch aimsir sgrios air tòrr de chlàr na h-iomain chaidh farpaisean a' Mhòid air adhart ann an Glaschu.

Bha fìor dheagh là aig Glaschu Meadhan Earra-Ghàidheal is iadsan a' togail nam prìomh fharpaisean do bhoireannaich agus dha na fir.

• Urram Camanachd a' Mhòid air iomanaiche Uibhisteach Ghlaschu

Ann an geama nam ban rinn GMA a' chùis 3-1 air Oilthigh Ghlaschu gus Cupa Dùbhlain LearnGaelic a bhuannachadh.

'S iad Lexie NicCoinnich, Rose Watson is Beth Page a bha air an targaid do GMA às dèidh do Hannah NicDhòmhnaill na h-oileanaich a chur air thoiseach tràth.

Thòisich GMA gu làidir ann an geama nam fear is Calum Moireasdan, Logan Adam is Ryan MacCoinnich (2) uile le tadhail sa chiad leth an aghaidh Obar Dobhair.

Chuir Fionnlagh Penman tadhal eile do GMA tràth san dàrna mus d' fhuair Calum Moireach fear air ais dha sgioba Fhìobha.

Chrìochnaich e 5-1 is Geall-dùbhlain na h-Aghaidh Mòire a' dol gu GMA.

Trì seachdainnean bho chuairt dheireannach Chupa na Camanachd tha geama fìor mhòr eile san amharc Disathairne eadar Ceann a' Ghiùthsaich is Baile Ùr an t-Slèibh.

Coinnichidh na sgiobaidhean aig an Dell is puing a dhìth air a' Bhaile Ùr airson an tiotal a dhearbhadh.

Ma 's e is gun dèan Ceann a' Ghiùthsaich an gnothach ge-tà, bidh an tiotal nan làmhan fhèin is cothrom aca a ghlèidheadh le ceithir puingean bhon dà gheama eile a tha air fhàgail aca.

Bidh na geamaichean sin air falbh an aghaidh Loch Abair is Ceann Loch Seile.

Tha Baile Ùr an t-Slèibh is Ceann a' Ghiùthsaich air coinneachadh ceithir tursan mar-tha air an t-seusan seo.

• Cupa MhicThàmhais le Ceann a' Ghiùthsaich

• Ceann a' Ghiùthsaich air Cupa na Camanachd a bhuannachadh

Bhuannaich am Baile Ùr a' chiad gheama 1-0 san lìog tràth san t-seusan.

Bhon uairsin ge-tà, tha Ceann a' Ghiùthsaich air a' chùis a dhèanamh orra 2-0 ann an Cupa MhicThàmhais, 4-1 ann an Cupa MhicAmhlaigh, is 2-1 ann an Cupa na Camanachd air a' mhìos a chaidh.

Bhuannaich Ceann a' Ghiùthsaich an geama mòr sin a dh'aindeoin is gu bheil grunnan de na cluicheadairean aca air a bhith air an goirteachadh, is tha dùil gum bi iad às aonais feadhainn dhiubh a-rithist Disathairne.

Tha e coltach gu bheil am Baile Ùr fhèin fhathast an dòchas gun urrainn dha Kenny Ros cluich eadar na puist, a dh'aindeoin is mar a chaidh a ghoirteachadh e fhèin sa chuairt dheireannaich de Chupa na Camanachd.

Tillidh Declan Brannan dhaibh is esan air a' chuairt dheireannach a chall is e air a chasg.

Tuilleadh an seo.

Tùs an deilbh, SNS

Tha ceistean gu leòr ann do choidse ùr na h-Alba Sebastien Pocognoli is an sgioba aige air call 2-1 ri Slobhinia ann an Glaschu ann an Lìog nan Nàiseanan oidhche Mhàirt.

Thàinig seo seachdain às dèidh do Phocognoli a' chiad gheama aige aig Hampden a chall 3-0 ris an Eilbheis.

Ged a bha Ryan Christie air Alba a chur air thoiseach is leth-uair air a' chloc, bhuannaich tadhail bho Matko is Šturm san dàrna leth an geama dha Slobhinia.

Bha grunn chothroman eile aca a bhiodh air an geama a dhèanamh fiù 's na bu chofhurtaile.

"Bha cus mhearachdan ann bho chluicheadairean le eòlas" thuirt Stiùbhart Urchadain, a bha ag aithris air a' gheama do BhBC Spòrs oidhche Mhàirt.

"Bha beàrnan air feadh an àite san loidhne-dìon.

"Tha gu leòr aig a' mhanaidsear ri smaoineachadh mu dheidhinn ach bhiodh e air an t-uabhas ionnsachadh thairis air na ceithir geamaichean seo."

Bidh Alba an dòchas gum bi cùisean nas fheàrr an ath-mhìos nuair a thilleas an sgioba nàiseanta airson gheamaichean an aghaidh Masadonia a Tuath aig Hampden agus an Eilbheis ann an St Gallen.

Tùs an deilbh, SNS

Cluichidh sgioba na h-Alba an ceathramh geama aca ann an nas lugha na cola-deug oidhche Mhàirt nuair a thig Slobhinia gu Hampden ann an Lìog nan Nàiseanan.

Bha na sgiobaidhean mar-tha co-ionnan 0-0 ann an Ljubljana sa chiad gheama fharpaiseach aig Sebastien Pocognoli.

Bhon uairsin tha na h-Albannaich air call 3-0 ris an Eilbheis is air a' chùis a dhèanamh 2-0 air Masadonia a Tuath oidhche Shathairne.

Thogadh trì puingean Dimàirt Alba os cionn Slobhinia sa bhuidhinn.

A' bruidhinn air Aithris na Maidne Dimàirt, thuirt Calum Dòmhnallach gur e geama cudromach a th' ann dhan choidse ùr aig Alba.

"Ma thèid againn buannachadh bidh a h-uile duine a' faireachdainn math mu dheidhinn Pocognoli.

"Mura tèid bidh 's dòcha ceist no dhà a' nochdadh. Mar sin tha mi a' smaoineachadh gur e sgioba an ìre mhath làidir a bhios ann."

Bidh Calum fhèin ann an sgioba BBC Spòrs oidhche Mhàirt.

Cluinnear an geama beò air BBC Radio nan Gàidheal is air BBC Sounds is am prògram a' tòiseachadh aig 7f.

'S iad GA United a thog Cupa Chlann Dòmhnaill às dèidh dhaibh an gnothach a dhèanamh 6-5 air Port Rìgh.

'S iad Joel Goldby (3), Ryan Watson (2) is Corey MacIllinnein a fhuair na tadhail do GA United is Kerien Austin (2), Sean MacAnndrais, Iain MacLeòid is Jamie Ros air an targaid do Phort Rìgh.

Dh'fhàg seo GA United aig mullach na buidhne is an cupa a' dol thuca.

Bha geama mòr cuideachd aig Iar-Thuath an Eilein Sgitheanaich Disathairne is iad a' cluich an aghaidh Saint Anthony's à Glaschu ann an Cupa Amaitearach na h-Alba.

Ged a bha sgioba Ghlaschu 2-0 air thoiseach ann am Port Rìgh, thàinig an Iar-Thuath air ais is trì tadhail bho Gus Dòmhnallach gam fàgail air thoiseach.

Fhuair Saint Anthony's breab-peanais a chuir iad dhan lìon, ge-tà, is an geama a' crìochnachadh 3-3.

Feumaidh na sgiobaidhean mar sin cluich a-rithist ann an Glaschu Disathairne seo tighinn.

Tùs an deilbh, Thomas Nugent/Geograph

Cha bhi Caol Bhòid ann am Prìomh Lìog na h-iomain an ath-sheusan 'son a' chiad turas bho 2007 is iad air a dhol sìos gu h-oifigeil air an deireadh-sheachdain.

Rinn na nàbaidhean aca Caol-Gleann a' chùis orra 1-0 ann an Clachan Ghleann Da-Ruail Disathairne - rud a bha eachdraidheil ann fhèin is seo a' chiad turas riamh a rinn Caol-Gleann a' chùis air Caol Bhòid aig ìre na ciad sgioba.

'S e Anndra MacBhiocair a chuir an tadhal cudromach.

Tha an dà phuing a' ciallachadh gu bheil cothrom fhathast aig Caol-Gleann fhèin fuireach sa Phrìomh Lìog.

Tha dà gheama aca air fhàgail - ri chèile an aghaidh Camanachd an Eilein Sgitheanaich - is a h-uile coltas gum bi feum aca air rudeigin bhon dà gheama sin.

Ghabh na Sgitheanaich iad fhèin ceum mòr a dh'ionnsaigh a bhith sàbhailte nuair a rinn iad a' chùis air Cabar Fèidh 4-2 ann an Srath Pheofhair.

• Dùthaich Bhòidheach is Iomain Mhòr sa Phrìomh Lìog

Chuir Dàn Dòmhnallach is Eàirdsidh Millar dà thadhal ri chèile dha na Sgitheanaich is Blair is Craig Moireasdan air an targaid 'son Cabers.

Cha robh Craig - a tha air a bhith air a ghoirteachadh 'son ùine - air a' phàirc ach gu sgiobalta 'son buille-peanais a chur dhan lìon.

Thog seo na Sgitheanaich os cionn Loch Abair san lìog.

Tha aona gheama air fhàgail aig na h-Abraich is sin an aghaidh Cheann a' Ghiùthsaich, is dùil gum bi sùil gheur acasan air na thachras anns na geamaichean eadar Caol-Gleann is na Sgitheanaich.

San Lìog Nàiseanta rinn Inbhir Aora a' chùis 4-1 air Lòbhat.

'S e 4-1 a bha ann cuideachd dha Cill Mhàilidh an aghaidh Loch Carran ann an Lìog Tuath 2.

Thog seo Cill Mhàilidh gu bàrr na lìge os cionn Camanachd Leòdhais, is chuir e às mar sin dha dòchas sam bith a bh' aig na Leòdhasaich air an tiotal.

Tha co-dhiù cuid den Arm Thartan dòchasach fhathast mu fhireannaich na h-Alba fo stiùir Sebastien Pocognoli.

Bithear an dòchas na 3 puingean fhaighinn ann am Masadonia a Tuath oidhche Shathairne.

Tùs an deilbh, Thomas Nugent/Geograph

Chaidh an geama mòr aig bonn Prìomh Lìog na h-iomain Disathairne eadar Caol-Gleann is Caol Bhòid a ghluasad bho Chlachan Ghleann Da-Ruail gu Stèideam Dhùn Omhain.

Tha na nàbaidhean aig bonn na lìge an-dràsta.

Chan eil cùs dòchais ann do Chaol Bhòid is thèid iad sìos gu h-oifigeil Disathairne ma chailleas iad.

Tha Caol-Gleann iad fhèin ann an suidheachadh dùbhlanach is bidh dà phuing deatamach dhaibhsan ma tha cothrom gu bhith aca An t-Eilean Sgitheanach no Loch Abar a ghlacadh.

• Dùthaich Bhòidheach is Iomain Mhòr sa Phrìomh Lìog

Bidh an geama ann a-nise air a' phàirc uachdaraich ann an Dùn Omhain aig 2:30f

Tha dùil ri uisge trom air a' Ghàidhealtachd Dihaoine a dh'fhaodadh buaidh a thoirt air clàr na h-iomain Disathairne, anns a bheil grunn gheamaichean cudromach.

A bharrachd air a' gheama ann an Dùn Omhain, tha dà gheama mòr eile sa Phrìomh Lìog.

Feumaidh Ceann a' Ghiùthsaich an dà phuing an aghaidh Cheann Loch Seile ann an Rèaraig air neo bidh an tiotal aig Baile Ùr an t-Slèibh.

Bidh na Sgitheanaich ag amas air na puingean ann an Srath Pheofhair an aghaidh Chabar Fèidh 'son sreap air falbh bhon bhonn.

Tùs an deilbh, PA

Thuirt Raibeart Mac an t-Saoir nach eil an Fharpais Fhosgailte a' tighinn a dh'Alba tric gu leòr.

Thug an goilfear às an Òban seachad a bheachd air thoiseach air Farpais Alfred Dunhill Links, a thòiseachas Diardaoin.

Bidh an fharpais ann thairis air ceithir là eadar Cill Rìmhinn, Càrn Ùstaidh is Kingsbarns.

Bha Mac an t-Saoir a' bruidhinn ann an Cill Rìmhinn, far an robh an Open ann an 2022 is far am bi farpais 2027.

Bha an Open cuideachd ann an Alba san Truthail ann an 2024.

Tha Mac an t-Saoir ag ràdh gu bheil feum air an fharpais a bhith ann an Alba nas trice agus air farsaingeachd de raointean.

"Tha mi den bheachd nach eil an Open ann an Alba cho tric 's a bu chòir na làithean seo.

"An seo fhèin (Cill Rìmhinn), Càrn Ùstaidh, Muirfield - b' fheàrr leam gun robh iad uile a' nochdadh.

"Na raointean seo - 's e raointean ceart, dùbhlanach a th' annta uile," thuirt e.

Thòisich an Open bho thùs ann an 1860 aig Preastabhaig is bha an fharpais ann an Alba a h-uile bliadhna gu 1894, nuair a chaidh a cluich 'son a' chiad turas ann an Sasainn aig St George's.

Bhon uairsin tha an fharpais air gluasad eadar raointean ann an Alba is Sasainn, is i cuideachd trì tursan air a bhith ann an Èirinn a Tuath.

Tùs an deilbh, SNS

Thuirt coidse ùr na h-Alba gu bheil e a' sùileachadh freagairt bho na cluicheadairean aige an aghaidh Masadonia a Tuath Disathairne às dèidh dhaibh call 3-0 ris an Eilbheis aig Hampden oidhche Mhàirt.

Chaidh Alba sìos gu deichnear tràth sa gheama nuair a phut Jack Hendry Dan Ndoye gu làr.

Chuir Ricardo Rodriguez am breab-saor an uairsin dhan lìon is Alba air toiseach-tòiseachaidh uabhasach a dhèanamh sa chiad gheama fo stiùir Pocognoli aig Hampden.

Thàinig tadhail eile bho Nico Elvedi is Zeki Amdouni san dàrna leth.

"Chan eil e furasta an aghaidh dheagh sgioba is le deichnear", thuirt Pocognoli.

"'S ann mu dheidhinn dè nì sinn a-nise a tha e. Bha cairt dhearg mhì-fhortanach ann is chaidh am breab-saor a-steach - cha b' urrainn na bu mhiosa.

"Rinn na balaich an dìcheall is bidh sinn an dòchas gum bi sinn a' coimhead air ais air an oidhche seo ann an dòigh dhiofraichte air a' cheann thall."

Bidh Alba a-nise an aghaidh Masadonia a Tuath ann an Skopje oidhche Shathairne is an uairsin an aghaidh Slobhinia a-rithist aig Hampden oidhche Mhàirt.

"A' coimhead air mar a tha cùisean air a dhol gu ruige seo, tha e cothromach a ràdh gur e Masadonia a Tuath an sgioba as miosa sa bhuidhinn againn," thuirt Iain MacDiarmaid, a bha ann an sgioba aithris BBC Spòrs aig Hamden oidhche Mhàirt.

"Ma tha sinn a' dol a dh'fhaighinn phuingean air falbh bhon taigh is ma tha sinn a' dol a dh'fhaicinn na stoidhle cluiche ùr a bhith air a chur an sàs - mar a chaidh a chur an sàs san dàrna leth an aghaidh Slobhinia - 's e an geama seo Disathairne a th' ann."

Tùs an deilbh, SNS

Thuirt coidse ùr na h-Alba gu bheil e airson is gun tòisich an sgioba aige an geama an aghaidh na h-Eilbheis aig Hampden oidhche Mhàirt mar a chrìochnaich iad an aghaidh Slobhinia Disathairne.

Bha Alba is Slobhinia co-ionnan 0-0 ann an Ljubljana sa chiad gheama aig Sebastien Pocognoli os cionn na sgioba ach chluich Alba gu math nas fheàrr san dàrna leth às dèidh dhaibh tòiseachadh car slaodach.

"Tha mi airson is gun cluich sinn 'son 90 mionaidean mar a chrìochnaich sinn ann an Slobhinia," thuirt Pocognoli.

"'S e briseadh-dùil a bh' ann nach do bhuannaich sinn - cha robh sinn riaraichte le aona phuing.

"Ach 'son a' chiad gheama gabhaidh sinn e".

Beò

Cluinnear an geama ann an Lìog nan Nàiseanan oidhche Mhairt beò air BBC Radio nan Gàidheal is am prògram a' tòiseachadh aig 7f.

Bidh Calum Dòmhnallach am measg na bhios ann an sgioba aithris BBC Spòrs is tha esan den bheachd gu bheil adhbhar aig Pocognoli a bhith misneachail.

"Bidh Pocognoli air gu leòr fhaicinn Disathairne gu bheil Alba comasach air tadhail a chur an aghaidh sgiobaidhean mar Slobhinia," thuirt Calum air Aithris na Maidne.

"Bidh dùbhlan nas motha rompha an aghaidh na h-Eilbheis ach chan eil sin a' ciallachadh nach tèid aca air an tadhal a tha sin a chur."

Seachdain às dèidh dhaibh coinneachadh ann an cuairt dheireannach Chupa na Camamachd thill Ceann a' Ghiùthsaich is Baile Ùr an t-Slèibh gu geamaichean lìge is iad ri chèile a' buannachadh 7-0.

Cha robh coltas ann gun do rinn am partaidh mòr a bh' aca às dèidh an cupa a bhuannachadh cron air Ceann a' Ghiùthsaich is iad a' toirt pronnadh air Loch Abar aig an Dell.

Chuir Roddy Young còig de na seachd tadhail e fhèin, ach bha buille ann dha fhèin is dhan sgioba nuair a ghoirtich e a ghlùin fhad 's a bha e a' cur an tadhail mu dheireadh den là.

Cha robh coltas ro mhath air idir is bidh Ceann a' Ghiùthsaich a-nise an dòchas nach eil seusan Young seachad agus trì geamaichean lìge fhathast aca ri cluich.

Bidh fear dhiubh sin an aghaidh a' Bhaile Ùir is a h-uile coltas ann gur e an geama a dh'innseas cò bhuannaicheas an tiotal.

Ghabh am Baile Ùr an rathad fada gu Taigh na Bruaich is iad 'son faighinn seachad gu sgiobalta air a' bhriseadh-dùil a bh' acasan sa chuairt dheireannaich.

Bha iad cus ro mhath do Chaol Bhòid is Steven Dòmhnallach gan cur air thoiseach às dèidh seachd mionaidean le buille-peanais.

'S e 3-0 a bh' ann aig letheach-slighe is thàinig ceithir tadhail eile san dàrna leth - trì dhiubh bho Iain Robinson - is feasgar gu math cofhurtail aig a' Bhaile Ùr.

Blàr aig a' bhonn

Sna geamaichean sa Phrìomh Lìog rinn Camanachd an Òbain a' chùis 3-0 air Cabar Fèidh is 's e 6-0 a bh' ann dha Ceann Loch Seile an aghaidh Caol-Gleann.

Tha geama mòr a-nise aig Caol-Gleann an aghaidh nan nàbaidhean aca Caol Bhòid Disathairne seo tighinn - geama a dh'fheumas iad buannachadh ma tha cothrom gu bhith aca fuireach sa Phrìomh Lìog.

San Lìog Nàiseanta thàinig seusan lìge doirbh do Ghlaschu Meadhan Earra-Ghàidheal gu ceann nuair a chaill iad 5-0 ri Inbhir Aora, a dh'èirich iad fhèin dà àite san lìog.

Tha cothrom fhathast aig GMA crìochnachadh le duais ge-tà, is iad gu bhith a' cluich ann an Cupa a' Mhòid air an 10mh den Dàmhair an aghaidh Obar Dobhair.

Cuideachd air an deireadh-sheachdain dh'èirich na Leòdhasaich gu bàrr Lìog Tuath 2 nuair a rinn iad a' chùis 3-1 air Srath Ghlais sa gheama mu dheireadh aca den t-seusan.

'S iad Paddy Wilson, Ally MacLaomainn is John Slaughter a fhuair na tadhail dha na Leòdhasaich agus Ciaran Melens air an targaid do Shrath Ghlais.

Feumaidh na Leòdhasaich a-nise feitheamh 'son faicinn mar a thèid do Cill Mhàilidh is Loch Abar is cothrom acasan leum os on cionn ma bhuannaicheas iad na geamaichean mu dheireadh aca.

Tùs an deilbh, Island Footie

Dhearbh cathraiche Chomann Ball-coise Leòdhais is Na Hearadh gun tèid cuairt dheireannach Chupa MalCivils am-bliadhna a chur dheth chun a' Ghiblein 2027.

Bha còir aig a' gheama eadar Barraigh is Am Bac a bhith ann Disathairne seo tighinn, às dèidh mar a chaidh a chur dheth an t-seachdain seo chaidh air sgàth na droch shìde.

Thuirt cathraiche a' chomainn, Brian Mac a' Ghobhainn, gu bheil an t-sìde agus trioblaidean siubhail dualtach buaidh a thoirt air a' gheama seo leis gu bheil am Foghair oirnn.

"'S ann air sgàth sin gur e spòrs samhraidh a th' ann am ball-coise sna h-Eileanan an Iar," thuirt e.

"Le sin, ghabh sinn an co-dhùnadh cuairt dheireannach Chupa MalCivils 2026 a ghluasad chun a' Ghiblein 2027.

"Thèid an dearbh là air an tèid an geama a chluich ainmeachadh nas fhaisge air an àm," thuirt e.

'S e seo an cupa airson sgiobaidhean nan Eilean Siar air fad.

'S iad Am Bac a bhuannaich an fharpais an-uiridh nuair a rinn iad a' chùis air an Rubha anns a chuairt dheireannaich 4-3.

Rinn sgiobair Cheann a' Ghiùthsaich moladh mòr air a' mhanaidsear aca Raghnall Ros às dèidh dha an sgioba a stiùireadh gu Cupa na Camanachd air an deireadh-sheachdain.

Rinn Kings an gnothach 2-1 air na seann nàimhdean aca Baile Ùr an t-Slèibh san Òban.

'S e seo a' chiad turas a tha Raghnall air Cupa na Camanachd a bhuannachadh mar mhanaidsear, ged a chàrn e stòras iongantach de bhuinn thairis air iomadh bliadhna mar chluicheadair.

Chaidh e na mhanaidsear air a' chluba an àite Iain Borthwick aig deireadh an t-seusain an-uiridh is Ceann a' Ghiùthsaich air Cupa na Camanachd a chall, rud a bha car connspaideach aig an àm.

'S e an sgiobair, Ruairidh MacAnndrais, a chuir an dà thadhal sa chuairt dheireannaich san Òban Disathairne agus Ceann a' Ghiùthsaich a' toirt na duaise air ais bho Bhaile Ùr an t-Slèibh.

• Mar a thachair e: Ceann a' Ghiùthsaich 2 Baile Ùr an t-Slèibh 1

Thuirt MacAnndrais gu bheil Ros air buaidh mhòr a thoirt air a' chluba mar mhanaidsear.

"Tha na tha Raghnall a' cur a-steach na shàr eisimpleir," thuirt MacAnndrais.

"'Tha iomain agus an cluba seo aig teis-meadhan a bheatha agus tha sinn uile a' faicinn sin.

"Tha e cho fìor chudromach dhuinn," thuirt e.

Le Cupa na Camanachd a-nise air ais ann an Ceann a' Ghiùthsaich, tha aire a' tionndadh dhan bhlàr eadar iad fhèin is Baile Ùr an t-Slèibh aig mullach na Prìomh Lìge.

Cluichidh Ceann a' Ghiùthsaich an aghaidh Loch Abair Disathairne seo tighinn is Baile Ùr an t-Slèibh air an rathad gu Taigh na Bruaich.

Tha a h-uile coltas ann gur e an geama eadar na nàbaidhean air an 10mh den Dàmhair a dh'innseas cò gheibh an làmhan air an tiotal.