सरकारद्वारा 'दाता सम्मेलनको प्रारम्भिक तयारी सुरु'

रसुवाको भोटेकोशी नदी र तलपट्टि त्रिशूलीमा आएको बाढीपछि झन्डै २५०० मानिस बेपत्ता रहेका विवरणमाझ अन्तर्राष्ट्रिय सहायता संस्थाहरू र विभिन्न सरकारहरूले आपत्कालीन सहायता प्रयासलाई तीव्र बनाएका छन्।

सारांश

भोटेकोशी-त्रिशूली बाढीका कारण मृत्यु भएका ६२६ जनाभन्दा बढीको शव विभिन्न स्थानमा फेला परेको प्रहरीद्वारा पुष्टि
बाढीप्रभावित स्थानहरूमा खोज र उद्धारकार्य जारी
नेपालमा विनाशकारी बाढीबाट कम्तीमा ६२६ जनाको मृत्यु भएको र २४०० भन्दा बढी हराइरहेको अधिकारीले बताएका छन्
तिब्बतमा मृत्यु हुनेको सङ्ख्या बढेर पुगेको र ५५४ जना हराइरहेको चिनियाँ राज्य नियन्त्रित मिडियाले जनाएको छ
युरोपियन कमिसन अध्यक्ष उर्सुला फन डर लाएनले युरोपले २० लाख यूरो नेपालमा मानवीय सहायताका लागि प्रदान गर्ने घोषणा गरेकी छन्
चिनियाँ राष्ट्रपति सी जिनपिङले नेपाली समकक्षीलाई समवेदना सन्देश पठाउँदै आफू दुवै देशका मानिसहरू यो मुस्किलबाट बाहिर निस्कन हातेमालो गर्नेछन् र आफ्ना घर सकेसम्म छिटो पुनर्निर्माण गर्नेमा विश्वस्त रहेको बताएका छन्
बाढी अघि र पछि लिइएका स्याटलाइट तस्बिरमा ठूलो तहमा विनाश भएको स्पष्ट देखिएको छ

लाइभ कभरेज

२९ अगष्ट २०२६आजका लागि हाम्रो यो लाइभ पेज हामी बन्द गर्दै छौँ
भोटेकोशी-त्रिशूली बाढीका ताजा र विश्वसनीय समाचार विवरणहरू हामीले आज पनि दिनभरि नै तपाईँसमक्ष प्रस्तुत गर्यौँ। हामीलाई साथ दिएर हाम्रा सामग्रीहरू उपभोग गरिदिनुभएकामा हामी हाम्रा समग्र पाठकप्रति आभारी छौँ।
आजका लागि हाम्रो यो लाइभ पेज हामीले बन्द गरेका छौँ।
रसुवा बाढीका विषयमा बीबीसी नेपाली सेवाका संवाददाताहरूले तयार पारेका विभिन्न सामग्रीहरू पढन, हेर्न र सुन्नका लागि बीबीसी नेपाली सेवाको वेबसाइट मा जानुहोला। हाम्रा सामग्रीहरू फेसबुक, इन्स्टाग्राम र यूट्यूबमा पनि उपलब्ध छन्।
२९ अगष्ट २०२६'आफन्तले खोज्दा भेटिने गरी' सामूहिक रूपमा शवहरू गाडिँदै
भोटेकोशी-त्रिशूली बाढीमा परेर ज्यान गुमाएकाहरूको शव लामो समयसम्म राख्न चुनौती देखिएपछि विभिन्न जिल्लामा शवहरूलाई सामूहिक रूपमा गाड्न थालिएको छ।
स्वास्थ्य तथा खाद्य स्वच्छता मन्त्रालयका सहप्रवक्ता डा. समीरकुमार अधिकारीले राष्ट्रिय कानुन र अन्तर्राष्ट्रिय मापदण्ड पूरा गरेर शव व्यवस्थापन गर्न थालिएको जानकारी दिए।
"चितवन र पूर्वी नवलपरासीले त्यो काम सुरु गरेको जानकारी आएको छ," उनले भने, "रसुवा, नुवाकोट, तनहुँ, कास्की, गोरखा लगायतका जिल्लाहरूमा पनि त्यसैअनुसार शवको व्यवस्थापन गरिन्छ।"
यसबारे विस्तृत समाचार पढ्नुहोस्।
२९ अगष्ट २०२६शनिवार थप विदेशीको उद्धार, तर अझै ३२० सम्पर्कविहीन
नेपाल पर्यटन बोर्डले रसुवा बाढीमा बेपत्ता बनेका विदेशी पर्यटकहरूमध्ये हालसम्म २६१ जनाको उद्धार भएको जनाएको छ।
शनिवार साँझ ६:३० मा जारी विज्ञप्तिमा उद्धार भएकामध्ये सबैभन्दा धेरै भारतका १६७ र चीनका ४० जना रहेको बताइएको छ।
हालसम्म १५ देशका नागरिकको उद्धार गरेको जनाउँदै बोर्डले त्यसबाहेक २० जनाको राष्ट्रियता खुल्न बाँकी रहेको जनाएको छ।
बोर्डको विवरणअनुसार अझै ३२० जना सम्पर्कविहीन छन्।
२९ अगष्ट २०२६नेपाल र चीनका परराष्ट्रमन्त्रीबीच टेलिफोन कुराकानी
परराष्ट्रमन्त्री शिशिर खनाल र चीनका विदेशमन्त्री वाङ यीबीच शनिबार टेलिफोन कुराकानी भएको र उक्त वार्तामा वास्तविक समयमा जल तथा मौसमसम्बन्धी तथ्यांक आदानप्रदानलाई थप प्रभावकारी बनाउने विषयमा छलफल भएको अधिकारीहरूले बताएका छन्।
परराष्ट्र मन्त्रीको सचिवालयद्वारा जारी प्रेस नोटमा भनिएको छ,“दुवै पक्षले भविष्यमा यस्ता विपद्का जोखिम न्यूनीकरण गर्न प्रभावकारी पूर्वसूचना प्रणाली विकास तथा दुई देशबीचका विद्यमान संयन्त्रलाई थप सुदृढ गर्ने विषयमा सहकार्य बढाउनेमा जोड दिएका छन्।”
दुवै नेताहरूबीच बाढी प्रभावित क्षेत्रमा जारी खोज, उद्धार तथा राहत कार्यका विषयमा छलफल भएको र दुवै नेताले विनाशकारी बाढीबाट भएको क्षतिमा गहिरो दुःख प्रकट गरेको अधिकारीहरूले जनाएका छन्।
२९ अगष्ट २०२६सुरुङमा उद्धार प्रयास राति पनि नरोकिने - ऊर्जामन्त्री, उद्धार हुनुअघि नै अक्सिजनका सिलिन्डर पुर्‍याउन खोजिएको मन्त्रीको भनाइ
रसुवामा विभिन्न जलविद्युत आयोजनाका सुरुङहरूमा फसेका मानिसहरूसम्म पुग्न शनिवार साँझसम्म उद्धारकर्ताहरूले प्रयास गरिरहेको ऊर्जा मन्त्री विराजभक्त श्रेष्ठले बताएका छन्।
मन्त्री श्रेष्ठले सुरुङभित्र फसेकाहरुको परिवारसँग मन्त्रालयमा शनिवार भेट्दै आज साँझसम्म टनले भेट्न सक्ने सम्भावना रहेको बताएका उनको सचिवालयले जनाएको छ।
'राति पनि काम रोकेका छैनौँ । राति रोक्यो भने आसै मर्छ। पालो फेरेर हुन्छ कि निरन्तरता दिनेवाला पार्ट हामी गरिरहेका छौँ,' श्रेष्ठलाई उद्धृत गर्दै उनको सचिवालयले जनाएको छ।
प्रभावित क्षेत्रका विभिन्न जलविद्युत आयोजनाको टनेलभित्र पाँच सय भन्दा बढी मजदुर, कर्मचारी र स्थानीय फसेको बताइएको छ।
त्यहाँका विभिन्न १२ वटा जलविद्युत आयोजनामा क्षति पुगेको सरकारी विवरण छ।
२९ अगष्ट २०२६त्रिशूली-३ 'बी' सुरुङमा फसेकाको उद्धार सम्भाव्यता हेर्न चिनियाँ टोली रसुवामा
रसुवाको माथिल्लो त्रिशूली ३ 'बी' जलविद्युत् आयोजनाको सुरुङभित्र फसेका मानिसहरूको उद्धारका निम्ति चिनियाँ विज्ञ टोलीलाई परिचालन गरिएको सरकारले जनाएको छ।
दुई दिनदेखि जारी प्रयासमा सरकारको अनुमतिमा ६ जना सम्मिलित चिनियाँ विज्ञ खटाइएको प्रधानमन्त्री सचिवालयले जनाएको छ।
"चिनियाँ हेलिकप्टरमार्फत् सोझै त्रिशूली क्षेत्रमा अवतरण गरेको उक्त टोलीले नेपाली सेनाको विज्ञ टोलीसँग पूर्ण समन्वय र सहकार्य गर्दै संयुक्त रूपमा उद्धारको काम सुरु गर्ने छ," सचिवालयले जनाएको छ।
संयुक्त टोलीले सुरुङभित्रको वस्तुस्थिति र सम्भाव्यताको प्राविधिक अनुगमन गर्ने बताइएको छ।
"प्रारम्भिक अनुगमनका आधारमा उद्धार सम्भव हुने देखिएमा चीनतर्फ रसुवा सीमा क्षेत्रमा तम्तयार अवस्थामा राखिएका चिनियाँ विज्ञहरूलाई पनि तत्काल घटनास्थलमा बोलाइने छ," सचिवालयले थप भनेको छ।
२९ अगष्ट २०२६दाता सम्मेलनबारे 'प्रारम्भिक तयारी सुरु' - परराष्ट्रमन्त्री खनाल
परराष्ट्रमन्त्री शिशिर खनालले पुनर्निर्माणका लागि सहायता जुटाउने विषयमा सोधिएको प्रश्नमा विपद्पछिको आवश्यकता आकलन सम्बन्धी प्रतिवेदन तयार पार्ने काम "सक्दो छिटो" गरिने बताए।
त्यसपछि उक्त प्रतिवेदनका आधारमा "सम्भवत: गरिने दाता सम्मेलन"मा काम गर्ने आफूहरूको योजना रहेको उनले बताए।
त्यससम्बन्धी "प्रारम्भिक तयारी सुरु भएको" बताउँदै सरकारको ध्यान अझै "सक्दो धेरैको जीवन बचाउनेतर्फ केन्द्रित रहेको" मन्त्री खनालले बताए।
उनले यी कामबारे अहिल्यै कुनै समय सीमा बताउन सकिने अवस्था नरहेको बताए।
२९ अगष्ट २०२६मित्रराष्ट्रसँग विशिष्ट सहयोगको अपेक्षा छ - परराष्ट्रमन्त्री खनाल
शव पहिचानमा भइरहेको समस्याबारे सोधिएको प्रश्नमा परराष्ट्रमन्त्री शिशिर खनालले नेपालसँग "सीमित फरेन्सिक सुविधा रहेको" भन्दै त्यसको पहिचानमा विदेशी सहयोगको "अपेक्षा" राखेको बताए।
उनले "भारी सामान उठाउने ड्रोन"को पनि आवश्यकता महसुस भएको बताए।
हामी "आफ्नो परिवेश बुझ्दै त्यसबारे प्रस्ट भइरहेका" छौँ। त्यसो भन्दै उनले "मित्रराष्ट्रहरूसँग विशिष्ट सहायता अपेक्षा गरिरहेको" बताए।
२९ अगष्ट २०२६'चीनसँग निकट समन्वयमा छौँ' – मन्त्री खनाल
नेपालका परराष्ट्रमन्त्री शिशिर खनालले तत्कालीन परिस्थितिमा चीनबाट समयमै सूचना नआएको भन्ने विषयमा पत्रकारहरूले सोधेको प्रश्नमा "घटनाको प्रकृतिअनुसार सम्भवतः चीनलाई पनि स्पष्ट थाहा नभएको हुन सक्ने" बताए।
"अहिले चीनबाट आवश्यक सूचना र विवरण आइरहेको छ," खनालले भने। "यस घटनापछि हामी चीनसँग निरन्तर समन्वयमा छौँ।"
हिमचट्टान खसेको ठाउँमा बनेको तालबारे चीनले समेत निगरानी गरिरहेको र सम्भावित जोखिमबारे जानकारी गराइरहेको उनले बताए।
२९ अगष्ट २०२६तत्कालको प्राथमिकता हराइरहेकाको 'जीवन रक्षा' - परराष्ट्रमन्त्री खनाल
नेपालका परराष्ट्र मन्त्री शिशिर खनालले सरकारको तत्कालको प्राथमिकता सम्पर्कविहीन बनेकाको ‘जीवन रक्षा गर्नु’ रहेको बताएका छन्।
जस क्रममा खोज तथा उद्धार कार्यका लागि आवश्यकता अनुसार सबै खाले प्रयास जारी रहेको मन्त्रालयमा जारी पत्रकार सम्मेलनमा उनले बताए।
"नदी प्रणाली र तटीय क्षेत्रहरू निरन्तर रूपमा निगरानी भइरहेको छ," मन्त्री खनालले भने।
उनले सुरुङमा फसेकाको उद्धारका लागि ११ सदस्यीय भारतीय निरीक्षण टोली परिचालन भएको र चीनबाट आउने क्रममा रहेको बताए।
विनाशको तह "निकै उल्लेख्य" रहेको भन्दै उनले पुनर्निर्माणका क्रममा मित्र राष्ट्र तथा दातृ निकायहरूबाट सहायता आवश्यक पर्ने बताए।
महत्त्वपूर्ण पूर्वाधारमा पुगेको क्षतिको मूल्याङ्कन भइरहेको बताए।
२९ अगष्ट २०२६हालसम्म १८४ जना पर्यटकको उद्धार, अझै ४२० सम्पर्कविहीन
नेपाल पर्यटन बोर्डले रसुवा बाढीमा बेपत्ता बनेका विदेशी पर्यटकहरूमध्ये हालसम्म १८४ जनाको उद्धार भएको जनाएको छ।
शनिवार दिउसो १:३० मा जारी सूचनामा त्यसबाहेक अन्य ३ जना पर्यटक अधिकारीहरूको सम्पर्कमा रहेको बताइएको छ।
बोर्डको विवरण अनुसार अझै ४२० जना सम्पर्कविहीन छन्।
२९ अगष्ट २०२६पुनर्निर्माणका लागि अर्बौं डलर आवश्यक पर्ने - अर्थमन्त्री वाग्ले
अर्थमन्त्री स्वर्णिम वाग्लेले रसुवाको विनाशकारी बाढीपछि पुनर्निर्माणका लागि ४ देखि ५ अर्ब अमेरिकी डलर आवश्यक पर्न सक्ने बताएका छन्।
"यो एक अनुमान मात्र हो। क्षति र नोक्सानीको विवरण सङ्कलन गर्ने काम जारी छ," वाग्लेले रोएटर्स समाचार संस्थासँग भने।
बाढीले कैयौँ घरहरू बगाउनुका साथै सडक तथा पुलजस्ता महत्त्वपूर्ण पूर्वाधारहरू ध्वस्त पारेको छ। विभिन्न जलविद्युत आयोजनाहरू समेत प्रभावित बनेका छन्।
भूउपग्रहबाट खिचिएका तस्बिरहरूमा एउटा व्यापारिक क्षेत्र लगभग पूर्ण रूपमा नष्ट भएको देखिन्छ।
२९ अगष्ट २०२६फसेकाको उद्धार प्रयासमा त्रिशूली-३ 'ए' मा 'सुरुङको मुख खोल्ने प्रयास जारी'
रसुवाको त्रिशूली-३ 'ए' जलविद्युत् आयोजनाको सुरुङभित्र फसेका मानिसहरूको उद्धार प्रयासका क्रममा शनिवार बिहानैदेखि सुरुङको मुख खोल्ने कार्यलाई थप तीव्र पारिएको प्रधानमन्त्रीको सचिवालयले जनाएको छ।
त्यहाँ दुई दिनदेखि उद्धार प्रयास भइरहेको बताइएको छ।
सेना, सशस्त्र प्रहरी र नेपाल प्रहरीको संयुक्त टोली लेदो तथा भग्नावशेष पन्छाउँदै सुरुङको प्रवेशद्वार खोल्ने कार्यमा अघि बढेको सचिवालयको भनाइ छ।
त्यहाँ उद्धार सहायताका लागि रेकी गर्न आएको भारतीय टोली समेत हाल त्रिशूली पुगेको बताइएको छ।
२९ अगष्ट २०२६प्रधानमन्त्रीलाई भेटेका प्रमुख प्रतिपक्षी दलका नेताले के भने?
केही बाढी प्रभावित क्षेत्र अवलोकन गरेर फर्केका प्रतिनिधिसभामा प्रमुख प्रतिपक्षी दलका नेता भीष्मराज आङ्देम्बेले शनिवार मध्याह्न प्रधानमन्त्रीसँग छलफल गरेका छन्।
आफूले लिखित रूपमै उद्धार, सडक पुन सञ्चालन र शव व्यवस्थापन गर्ने विषयमा प्रधानमन्त्रीको ध्यानाकर्षण गराएको कांग्रेस सांसद आङ्देम्बेले बताएका छन्।
क्षतिग्रस्त बनेका कैयौँ पुलहरूमध्ये 'तत्काल कम्तीमा ७ स्थानमा बेलीब्रिज जडान गरियोस्' भन्ने उनको एउटा सुझाव छ।
"रसुवा र नुवाकोटका लागि छुट्टाछुट्टै हेलिकप्टर उद्धार युनिट बनाएर परिचालन गरियोस्," उनले प्रधानमन्त्रीलाई बुझाएको ध्यानाकर्षण पत्रको एउटा बुँदामा उल्लेख छ।
सुरुङ, भग्नावशेष वा अन्य स्थानमा नागरिक फसेको सम्भावना रहेको भन्दै उनीहरूको जीवन रक्षाका लागि अन्तर्राष्ट्रिय उद्धार टोलीलाई परिचालनको अनुमति दिन समेत उनले माग गरेका छन्।
२९ अगष्ट २०२६बाढीबाट मृत्यु हुनेको सङ्ख्या ६२६ पुग्यो
राष्ट्रिय विपद् जोखिम न्यूनिकरण तथा व्यवस्थापन प्राधिकरणले रसुवा बाढीमा ज्यान गुमाएका ६२६ जना शव फेला परेको जनाएको छ।
अधिकारीहरूले २,४२६ जना बेपत्ता रहेको बताएका छन्। हालसम्म जम्मा ४,४५१ जनाको उद्धार गरिएको अधिकारीहरूले जनाएका छन्।
सबैभन्दा धेरै चितवनमा २३३ वटा र त्यसपछि नवलपरासी पूर्वमा १५८ वटा शव फेला पारिएको प्रहरीले उल्लेख गरेको छ।
प्रहरीका अनुसार गोरखामा ४८, नवलपरासी पश्चिममा ४७, धादिङमा ४५, नुवाकोटमा ४१, तनहुँमा ३१ र रसुवामा १३ वटा शव फेला पारिएको छ।
त्यस्तै करिब दुई हजार मानिसहरू हराइरहेका अधिकारीहरूले बताएका छन्।
घाइते तथा उद्धार गरिएका मानिसको सङ्ख्या २,३०१ रहेको प्रहरीले जनाएको छ।
काठमाण्डू उपत्यकामा विभिन्न अस्पतालहरूमा उपचाररत र डिस्चार्ज भएका व्यक्तिको सङ्ख्या १४० रहेको छ।
२९ अगष्ट २०२६चितवनमा सङ्कलित शव पहिचान गर्न ‘गाह्रो’
बुधवारको विनाशकारी बाढीमा परी ज्यान गुमाएकाहरूको चितवनमा हालसम्म सङ्कलन भएका २३३ मध्ये ४ वटा शव मात्र पहिचान भएको स्थानीय प्रशासनले जनाएको छ।
बाँकी २२९ वटा शव होल्डिङ सेन्टर तथा स्वास्थ्य संस्थाहरूमा रहेका जिल्ला प्रशासन कार्यालय चितवनले शनिवार बिहान एउटा विज्ञप्तिमार्फत् बताएको छ।
“स्वास्थ्य संस्थाहरू तथा नदी तटबाट सङ्कलन भएका शव/शवका अवशेषहरू सडे-गलेका र अब पहिचान हुन/गर्न नसकिने अवस्थामा छन्। तत्काल व्यवस्थापकीय प्रबन्धबाट राखिएका त्यस्ता शवहरू दुर्गन्धित बन्दै गएका कारण सङ्क्रमण/महामारी फैलिन सक्ने भन्ने स्वास्थ्य क्षेत्रका विज्ञहरूको राय/विश्लेषण रहेको छ,” विज्ञप्तिमा उल्लेख छ।
“तसर्थ प्राप्त शवहरू थप सड्न/गल्न नदिन, त्यस्ता शवहरूको सम्मानजनक, सुरक्षित र कानुनी रूपमा व्यवस्थापन गरी सम्भावित सङ्क्रमणको जोखिमबाट बचाउन बाध्यात्मक विकल्पका रूपमा जिल्ला सुरक्षा समिति चितवनको आज मिति २०८३।०५। १३ को निर्णयानुसार पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३ बमोजिम सबै शवहरू जमिनमुनि व्यवस्थापन गर्ने निर्णय भएको छ।”
उक्त निर्णयबमोजिम सबै शवहरूको डीएनए नमुना सङ्कलन गरी सङ्केत नम्बरका आधारमा अभिलेख राख्ने गरी शनिवारदेखि भरतपुर महानगरपालिका वडा नं. १ देवघाटस्थित खुला स्थानमा व्यवस्थापन गरिने ब्यहोरा सम्बन्धित सबैको जानकारीका लागि अनुरोध गरिएको प्रशासनले जनाएको छ।
२९ अगष्ट २०२६बालबालिका उद्धारमा लागिपरेका छौँ : सेभ द चिल्ड्रेन
सेभ द चिल्ड्रेन यूकेले नेपालमा सो संस्थाको टोलीले बालबालिकाको उद्धारमा सम्पूर्ण रूपमा लागिपरेको बीबीसीलाई बताएको छ।
त्यस्ता बालबालिकामध्ये धेरै जना “आमाबुवाविहीन र फसेका अवस्थामा” रहेका संस्थाका जर्ज ग्राहमले बीबीसी न्यूज च्यानललाई बताए।
“करिब ५० जना त्यस्ता बालबालिका विद्यालयभित्र फसेका हामीले सुनेका छौँ र उनीहरूलाई शुद्ध खानेपानीमा पहुँच नभएको हुन सक्ने अवस्था रहेको” उनले उल्लेख गरे।
“उनीहरूको विद्यालय र सडकलाई जोड्ने पुलहरू बाढीले बगाएको छ। ती बालबालिकाको अवस्था पत्ता लगाउन हामी लागि परेका छौँ,” ग्राहमले अगाडि थपे।
सेभ द चिल्ड्रेनको टोलीसम्म पुगेका नौ जनालाई उद्धार गरिएको उनले जानकारी दिए।
२९ अगष्ट २०२६दशौँ हजार घरपरिवारलाई खाद्यान्न र खानेपानीको आवश्यकता: संयुक्त राष्ट्र सङ्घ, थप वर्षा हुने सम्भावना रहेकाले उद्धार तथा खोजी कार्यमा कठिनाइ आउन सक्ने
नेपालमा आएको विनाशकारी बाढीपछि झन्डै दुई हजार मानिस अझै बेपत्ता रहेका विवरणमाझ अन्तर्राष्ट्रिय सहायता संस्थाहरू र विभिन्न सरकारहरूले आपत्कालीन सहायता प्रयासलाई तीव्र बनाएका छन्।
युरोपेली सङ्घलगायत क्यानडा र अमेरिकासहितका देशहरूले नेपालमा सहायता सामग्री वा आर्थिक सहयोग पठाउने घोषणा गरेका छन्।
संयुक्त राष्ट्र सङ्घका एक प्रवक्ताका अनुसार दशौँ हजार घरपरिवारलाई खाद्यान्न र आपत्कालीन रूपमा खानेपानीको आवश्यकता परेको छ।
नेपाली अधिकारीहरूका अनुसार करिब चार हजार मानिसलाई उद्धार गरिएको छ भने पाँच सयभन्दा बढीको मृत्यु भएको पुष्टि भएको छ।
चीनले पनि सात जनाको मृत्यु भएको पुष्टि गरेको छ। थप वर्षा हुने सम्भावना रहेकाले उद्धार तथा खोजी कार्यमा थप कठिनाइ आउन सक्ने बताइएको छ।
२९ अगष्ट २०२६'परिवारको सम्पर्कमा आएकाहरू घर फर्किए', उद्धार गरिएकालाई कभर्ड हलदेखि सेफ हाउससम्म राखिएको छ
नुवाकोट र रसुवाको विभिन्न स्थानबाट बिहीवार ठूलो सङ्ख्यामा उद्धार गरेर ल्याइएकाहरूलाई जिल्लाको विभिन्न स्थानमा राखिएको सरकारी अधिकारीहरूले बताएका।
नुवाकोटको बट्टार कभर्ड हल, विदुरमा रहेको सेफ हाउस, कोलोनीलगायत स्थानमा खासगरी रसुवाबाट उद्धार गरेर ल्याइएकालाई राखिएको नुवाकोटका प्रमुख जिल्ला अधिकारी शम्भुप्रसाद रेग्मीले बताउँछन्।
उनका अनुसार नुवाकोट र रसुवाको विभिन्न स्थानबाट पेसा व्यवसायको सिलसिलामा आएकाहरू केही भने परिवारको सम्पर्कमा पुगेपछि घर फर्किएका छन्।
२८ अगष्ट २०२६भोटेकोशीमा पुनः बाढी बढेको चेतावनी, 'उच्च सतर्कता'का लागि आह्वान
राष्ट्रिय विपद् जोखिम न्यूनीकरण तथा व्यवस्थापन प्राधिकरणले चीनतर्फबाट प्राप्त सूचनाअनुसार भोटेकोशीमा पुनः बाढी बढेको जनाउँदै अर्को सूचना नआउँदासम्म उच्च सतर्कता सहित सुरक्षित स्थानमा रहन अनुरोध गरेको छ।
जिल्ला प्रहरी कार्यालय रसुवामा चीनले सूचना पठाएको बताउँदै त्रिशूली नदीको तटीय क्षेत्रमा चितवनको मुग्लिनसम्म त्यस्तो सतर्कता अपनाउन आग्रह गरिएको हो।

सरकारद्वारा 'दाता सम्मेलनको प्रारम्भिक तयारी सुरु'

सारांश

लाइभ कभरेज

२९ अगष्ट २०२६आजका लागि हाम्रो यो लाइभ पेज हामी बन्द गर्दै छौँ

२९ अगष्ट २०२६'आफन्तले खोज्दा भेटिने गरी' सामूहिक रूपमा शवहरू गाडिँदै

२९ अगष्ट २०२६शनिवार थप विदेशीको उद्धार, तर अझै ३२० सम्पर्कविहीन

२९ अगष्ट २०२६नेपाल र चीनका परराष्ट्रमन्त्रीबीच टेलिफोन कुराकानी

२९ अगष्ट २०२६त्रिशूली-३ 'बी' सुरुङमा फसेकाको उद्धार सम्भाव्यता हेर्न चिनियाँ टोली रसुवामा

२९ अगष्ट २०२६दाता सम्मेलनबारे 'प्रारम्भिक तयारी सुरु' - परराष्ट्रमन्त्री खनाल

२९ अगष्ट २०२६मित्रराष्ट्रसँग विशिष्ट सहयोगको अपेक्षा छ - परराष्ट्रमन्त्री खनाल

२९ अगष्ट २०२६'चीनसँग निकट समन्वयमा छौँ' – मन्त्री खनाल

२९ अगष्ट २०२६तत्कालको प्राथमिकता हराइरहेकाको 'जीवन रक्षा' - परराष्ट्रमन्त्री खनाल

२९ अगष्ट २०२६हालसम्म १८४ जना पर्यटकको उद्धार, अझै ४२० सम्पर्कविहीन

२९ अगष्ट २०२६पुनर्निर्माणका लागि अर्बौं डलर आवश्यक पर्ने - अर्थमन्त्री वाग्ले

२९ अगष्ट २०२६फसेकाको उद्धार प्रयासमा त्रिशूली-३ 'ए' मा 'सुरुङको मुख खोल्ने प्रयास जारी'

२९ अगष्ट २०२६प्रधानमन्त्रीलाई भेटेका प्रमुख प्रतिपक्षी दलका नेताले के भने?

२९ अगष्ट २०२६बाढीबाट मृत्यु हुनेको सङ्ख्या ६२६ पुग्यो

२९ अगष्ट २०२६चितवनमा सङ्कलित शव पहिचान गर्न ‘गाह्रो’

२९ अगष्ट २०२६बालबालिका उद्धारमा लागिपरेका छौँ : सेभ द चिल्ड्रेन

२९ अगष्ट २०२६'परिवारको सम्पर्कमा आएकाहरू घर फर्किए', उद्धार गरिएकालाई कभर्ड हलदेखि सेफ हाउससम्म राखिएको छ

२८ अगष्ट २०२६भोटेकोशीमा पुनः बाढी बढेको चेतावनी, 'उच्च सतर्कता'का लागि आह्वान