Taith Cymru i Euro 2020

Bydd carfan tîm pêl-droed Cymru'n mwynhau'r Nadolig gan wybod y byddant yn chwarae ym Mhencampwriaethau Euro 2020 yr haf nesaf.

Ar 13 Mehefin bydd Cymru'n wynebu'r Swistir yn Baku, yna gemau yn erbyn Twrci a'r Eidal, cyn gobeithio ennill lle yn rownd yr 16 olaf.

Ond nid oedd cyrraedd y rowndiau terfynol yn hawdd i'r tîm cenedlaethol, cafwyd dechreuad digon anodd i'r ymgyrch. Felly dyma ail-fyw'r daith i Euro 2020.

24 Mawrth, 2019

Dechreuodd ymgyrch Cymru gyda buddugoliaeth yng Nghaerdydd yn erbyn Slofacia. Dan James sgoriodd unig gôl y gêm yn y pum munud cyntaf, ac roedd rhaid i Hennessey wneud arbediadau yn y 10 munud olaf i atal Slofacia rhag unioni'r sgôr.

8 Mehefin, 2019

Dwy gêm oddi cartref mewn tri diwrnod oedd hi wedyn, gan golli'r gyntaf yn y gwres tanbaid yn Osijek. Cododd y tymheredd i dros 30C gradd yn Stadion Gradski, a thîm ifanc Cymru'n ei chael hi'n anodd dal 'mlaen yn erbyn chwaraewyr o safon Luka Modrić ac Ivan Perišić.

Sgoriodd James Lawrence i'w gôl ei hun, ac fe sgoriodd Perišić i ddyblu mantais Croatia. Sgoriodd yr eilydd David Brooks ei gôl gyntaf dros Gymru i'w gwneud hi'n 2-1, ac felly arhosodd hi am weddill y gêm er i Gymru gael cyfleoedd i hawlio gêm gyfartal.

11 Mehefin, 2019

Colli oedd hanes Cymru yn Budapest hefyd, a hynny o 1-0 diolch i gôl gan Máté Pátkai yn hwyr yn y gêm. Roedd hi'n noson rwystredig iawn i garfan Cymru, a adawodd eu gobeithion o gyrraedd Euro 2020 mewn cyflwr bregus iawn.

Taith Cymru i Euro 2020

6 Medi, 2019

Roedd y fuddugoliaeth yn erbyn Azerbaijan gartref mis Medi yn un gwbl angenrheidiol. Dyma gêm a oedd, ar bapur, yr hawsaf un o holl ymgyrch Cymru. Gareth Bale oedd yr arwr gan sgorio gydag ond chwe munud o'r gêm yn weddill i roi'r fuddugoliaeth i Gymru.

10 Hydref, 2019

Fe brofodd y pwynt yma yn Trnava yn hollbwysig er mwyn cadw'r gobaith o gyrraedd rowndiau terfynol Euro 2020 yn fyw.

Eiliadau wedi i Gareth Bale daro trawst y gôl gydag ergyd fe sgoriodd ymosodwr Wigan, Kieffer Moore ei gôl gyntaf dros Gymru. Sgoriodd Juraj Kucka dros Slofacia yn gynnar yn yr ail hanner ac oni bai am arbediad gwych gan Wayne Hennessey fe fyddai wedi cael ail gôl.

13 Hydref, 2019

Gyda tair gêm o'r ymgyrch ar ôl, yr amcan i Gymru oedd peidio â cholli gêm arall. Roedd wynebu Croatia, a gyrhaeddodd rownd derfynol Cwpan y Byd y llynedd, yn dasg anodd.

Sgoriodd y chwaraewr ganol cae Nikola Vlašić yn gynnar i roi Croatia ar y blaen. Ond fe sgoriodd arwr Cymru, Gareth Bale, unwaith eto i unioni'r sgôr a sicrhau pwynt gwerthfawr i Gymru.

16 Tachwedd, 2019

Os oedd Azerbaijan yn cael ei ystyried fel tîm pêl-droed sâl fe ddylai'r fuddugoliaeth agos 2-1 yng Nghaerdydd ym mis Medi wedi bod yn agoriad llygaid i gefnogwyr Cymru.

Roedd yr Azeri'n drefnus a gweithgar, ond llwyddodd Cymru i ennill gyda buddugoliaeth gyfforddus. Kieffer Moore a Harry Wilson oedd y sgorwyr, gyda'r canlyniad yn golygu bod y cyfan yn y fantol yn y gêm olaf yn erbyn Hwngari.

19 Tachwedd, 2019

Ac felly i gêm ola'r ymgyrch, Hwngari gartref. Roedd Cymru'n gwybod bod eu tynged yn eu dwylo'u hunain, ac y byddai buddugoliaeth yn erbyn Hwngari yn sicrhau lle yn Euro 2020.

Seren Juventus, Aaron Ramsey oedd yr arwr gan sgorio dwy gôl i'r cochion, un ym mhob hanner. Dyma oedd cyfle cyntaf Ryan Giggs i ddewis Ramsey a Gareth Bale i ddechrau gêm gyda'u gilydd ers cymryd yr awenau fel rheolwr.

Roedd dathlu mawr yng Stadiwm Dinas Caerdydd wedi i Gymru sicrhau eu lle ym Mhencampwriaethau Ewrop am yr ail waith yn olynol.

Hefyd o ddiddordeb: