Senator Sharafadeen Alli campaign react to viral video of govnorship candidate wit students wey dey make Nigerians tok

Di campaign organisation of di All Progressives Congress (APC) govnorship candidate for Oyo State, Senator Sharafadeen Alli, say di viral video wey show am dey interact wit students during interview no dey inappropriate.

Alli bin come under criticism afta di circulation of one video wey show am interacting wit students during one interview.

Di video, wey don go viral on social media, trigger reactions from Nigerians, as pipo question Alli conduct during di encounter.

For inside di video, Alli wey currently dey represent Oyo South Senatorial District for di National Assembly, carry one student for leg during interview.

As di student wey e carry for leg dey ask am question, Alli dey respond and dey rub im thigh. Some social media users don give different interpretations to dis interaction as online debate don begin.

However, Alli campaign say di student and oda pipo inside di video na students of The Polytechnic, Ibadan, wey bin visit di politician to seek support for one of dia programmes and conduct interview wit am.

According to di campaign, di number of pipo for di venue pass di available seating capacity wen di students arrive, and dis make some attendees no get seat to sidon.

Di campaign say wetin happun na spontaneous and fatherly gesture afta e invite one of di students to sit on im lap so di interview fit continue.

Di campaign insist say di interaction no get sexual or suggestive undertone and accused some online platforms of deliberately assigning inappropriate meaning to di video.

"E dey deeply unfortunate say political desperation don descend to dis level, wia ordinary interaction between a fatherly political leader and students wey come seek support for dia programme dey deliberately twisted into somtin sordid," di campaign tok.

Who be Senator Sharafadeen Alli?

Senator Sharafadeen Abiodun Alli (BSA) na Nigerian lawyer, traditional leader, and politician wey dey represent Oyo South for di 10th National Assembly under All Progressive Congress (APC).

Dem born for April 20, 1963, for Ibadan, e hold LL.B., Master for Law, and PhD for Legislative and Strategic Studies, and call to di Bar for 1987.

Alli start im political career as di first elected Chairman of Ibadan North LGA (1991), later serve as Secretary to di State Government and Chief of Staff for Oyo State. E also chair Odu'a Investment Company from 2011 to 2014.

For 1991, at age 28, na im be di first democratically elected Chairman of Ibadan North Local Government Area.

Thirty-three years old, Alli represent Oyo South Senatorial District for 1996, but di military coup end Nigeria democratic transition at di time and im take oath of office. Alli remain for politics as im hold di position as Oyo state secretary and acting chairman of di Peoples Democratic Party from September to November 1999, secretary to di Oyo state govment under govnor Rashidi Ladoja for 2003. E bin serve as Chief of Staff to di governor Ladoja for 2005.

Alli enta to di senate for 2023, na im be di Chairman of di Senate Committee on Electoral Matters. As traditional leader, na im be di Ekarun Balogun of Ibadanland and run di BSA Foundation for community development.

Recently, e advocate for ecological funding to tackle flooding, lead APC unity efforts, support President Tinubu 2027 bid, and promote di establishment of Federal Medical Centre for im district. Alli don officially declare say im go run for di 2027 Oyo State governorship election under di APC.