ኢራን፡ ድሕሪቲ ኣብ መርዓ ሰባት ዝቐተለ መጥቃዕቲ ኣመሪካ 'ናይ ሕነ ምፍዳይ' ስጕምቲ ወሲዳ

ኢራን፡ ኣብ ወተሃደራዊ መዓስከራት ኣመሪካ መጥቃዕትታት ከም ዝፈፀመት፡ መንግስታዊ መራኸቢ ብዙሓን እታ ሃገርን ሰራዊት ዮርዳኖስን ገሊፆም።

ኣመሪካ ኣብ ልዕሊ ኢራን እትፍፅሞም መጥቃዕትታት ዳግማይ ብሰሉስ ምጅማራ ስዒቡ እያ፡ ቴህራን እዚ ሕነ ናይ ምፍዳይ መጥቃዕቲ ፈፂማ ዘላ።

ኣብ ደቡባዊ ኢራን ብዝተፈፀመ መጥቃዕቲ ሚሳይል ኣመሪካ ኣርባዕተ ሰባት ከም ዝተቐተሉ ትካል ቀይሕ ወርሒ ኢራን ገሊፁ።

ኣብ ከተማ ሲሪቕ ኣብ መርዓ ዝነበሩ ሓደ ህፃን ሓዊሱ፡ ኣርባዕተ ሰባት ካብቲ ነትጕ ብዝወፅኡ ፍንጭልጫላት ከም ዝተቐተሉን ልዕሊ 50 ሰባት ከም ዝቘሰሉን ተሓቢሩ።

ማእከላይ እዚ ኣመሪካ (ሴንቲኮም)፡ እዚ መጥቃዕቲ፡ ሓይልታት ሓለዋ እስላማዊ ሰውራ ኢራን ኣብዚ ቀረባ እዋን ኣብ መፃብቦ ሆርሙዝ ንዝርከባ መራኽብ ንግዲ ንምጥቃዕ ምፍታኖም ስዒቡ ከም ዝተፈፀመ ኣፍሊጡ።

ኣመሪካ ብዝፈፀመቶም መጥቃዕትታት ከም ትጠዓስ ዝተሓነየ ሓይሊ ሓለዋ እስላማዊ ሰውራ ኢራን፡ ኣብ ዮርዳኖስ፡ ኩዌትን ባሕሬንን ኣብ ዝርከቡ ወተሃደራዊ መዓስከራት ኣመሪካ መጥቃዕትታት ፈፂሙ።

ሓለዋ እስላማዊ ሰውራ ኢራን፡ ኣብ ዮርዳኖስ ኣቓባ ኣብ ልዕሊ ዝርከብ መዓስከር ወተሃደራት ሓይሊ ባሕሪ ኣመሪካ ሕነ ናይ ምፍዳይ መጥቃዕቲ ከም ዝፈፀመ ማዕከን ዜና ታስኒም ፀብፂቡ።

ሰራዊት ጆርዳን፡ 13 ባሊስቲክ ሚሳይላት ከም ዘኽሸፉን 10 ከም ዘዕነዉን ገሊፆም። ሰለስተ ባሊስቲክ ሚሳይላት ድማ ብዙሕ ሰብ ኣብ ዘይነብረሎም ርሑቕ ከባቢታት ከም ዝዓለቡ ሓቢሩ።

እንተዀነ፡ በዚ መጥቃዕቲ ዘጋጠመ ሞት ወይ መጕዳእቲ እንተ ሃልዩ ኣይተገለፀን።

ኣብ ባሕሬን'ውን ብዙሓት ነትጕታት ከም ዝተሰምዑ መራኸቢ ብዙሓን ኢራን ፀብፂበን።

ብኻልእ ዜና፡ ሰራዊት ኩዌት፡ ናይ ኣየር ምክልኻል ስርዓታቱ ብረቡዕ ንግሆ ንዝተወንጨፉ ሚሳይላት ኢራን ምላሽ ከም ዝሃበ ኣፍሊጡ።

ፕረዚደንት ኣመሪካ ዶናልድ ትራምፕ፡ ኢራን ንመጥቃዕትታት ኣመሪካ ሕነ ምፍዳይ እንተ ደኣ ፈፂማ፡ ቴህራን ዳግማይ ብዋሽንግተን መጥቃዕቲ ከም ዝፍፀማ፡ እቲ ካብ ብሕዚ ዝፍፀም መጥቃዕቲ ድማ "ዝኸበደን ዝሓየለን" ከም ዝኸውን ኣጠንቂቑ ነይሩ።

ማእከላይ እዚ ኣመሪካ - ሴንቲኮም፡ ሓይልታት ኣመሪካ ሰዓት 12፡00 (ከባብያዊ ኣቈፃፅራ) ንዒላማታት ሓለዋ እስላማዊ ሰውራ ኢራን ምውቃዕ ከም ዝጀመሩን እቲ ወተሃደራዊ ስርሒት ብረቡዕ ንግሆ ከም ዝተዛዘመን ኣፍሊጡ።

ከባቢታት ጫባሃር፡ ኮናራክ፡ ጂሮፍት፡ ደሴታት ቃሽምን ባንዳር ዓባስን ሓዊሱ ብተወንጨፍቲ ከም ዝተወቕዑ መንግስታዊ መራኸቢ ብዙሓን ኢራን ፀብፂቡ።

ካፒቴን ሓይሊ ባሕሪ ኣመሪካ ቲም ሃውኪንስ፡ እቲ ሰራዊት ብዛዕባ ኣብ ሲሪቕ ዝተፈፀሙ መጥቃዕትታት ዝቐረቡ ፀብፃባት ከም ዝፈልጥ ንቢቢሲ ገሊፁ።

ቲም ሃውኪንስ፡ "ሰራዊት ኣመሪካ ንሓይልታት ሓለዋ እስላማዊ ሰውራ ኢራን'ምበር ብፍፁም ንሰላማውያን ሰባት ዒላማ ኣይገብርን" ኢሉ።

ኣመሪካ ኣብ መወዳእታ ናይዚ ሰሙን ኣብ ልዕሊ ኢራን መጥቃዕቲ ምፍፃማ ስዒቡ፡ ኣብ መንጎ ቴህራንን ዋሽንግተንን ዝተወልዐ ጎንፂ ዳግማይ ዓሪጉ ኣሎ።

እቲ ኣብ መንጎ ክልቲአን ሃገራት ኣብ ዝሓለፈ ሰነ ዝተፈረመ ናይ 60 መዓልቲ ስምምዕ ምብቅዑ'ውን፡ እቲ ግጭት ከም ብሓድሽ ክውላዕ ደሪኹ።

ዋሽንግተን፡ ኣብ ልዕሊ ቴህራን ፀቕጢ ንምፍጣርን ንመንግስቲ እታ ሃገር ንምንፃልን ዝዓለመ ሓደሽቲ ማዕቐባት ኣብ ልዕሊ ኢራን ከም እተንብር ኣፍሊጣ ኣላ።

ፕረዚደንት ኢራን ማስዑድ ፔዘሽኪያን፡ ኣመሪካ ነቲ ኣብ ዝሓለፈ ሰነ ዝተኸተመ ስምምዕ ንምኽባር ተበግሶ እንተ ደኣ ኣርእያ፡ ኢራን'ውን ተመሳሳሊ ምላሽ ከም ትህብ ምግላፁ፡ መንግስታዊ መራኸቢ ብዙሓን ኢራን ፀብፂቡ።