வெலிகொண்டா: மூழ்கும் கிராமத்துக்குள் இந்த மூவரும் சென்றது ஏன்? மரத்தின் மீது ஏறி தப்பித்தது எப்படி?

புல சுப்பையா வெலிகொண்டா திட்டத்திலிருந்து தண்ணீர் திறந்துவிடப்பட்டதைத் தொடர்ந்து, நீரில் மூழ்கும் அபாயமுள்ள கிராமத்துக்குச் சென்ற மூன்று பேர், திடீர் நீரோட்டத்தில் சிக்கி சுமார் எட்டு மணி நேரத்துக்குப் பிறகு அதிகாரிகளின் மீட்பு நடவடிக்கையால் பத்திரமாக மீட்கப்பட்டனர்.

ஆகஸ்ட் 31ஆம் தேதி, திங்கள்கிழமை இரவு நடந்த இந்தச் சம்பவம் குறித்த விவரங்களை மார்க்காபுரம் வருவாய் கோட்டாட்சியர் சிவராமி ரெட்டியும், துணைக் காவல் கண்காணிப்பாளர் நாகராஜும் பிபிசிக்கு விளக்கினர்.

ஆந்திரப் பிரதேசம் மார்க்காபுரம் அருகே அமைந்துள்ள வெலிகொண்டா திட்டத்தை, அம்மாநில முதலமைச்சர் சந்திரபாபு நாயுடு ஆகஸ்ட் 31ஆம் தேதி, திங்கள்கிழமை காலை முறைப்படித் தொடங்கி வைத்தார். அதற்கேற்ப, அத்திட்டத்தின் ஃபீடர் கால்வாய் மதகுகளைத் திறந்து கிருஷ்ணா நதி நீரை நல்லமல சாகருக்கு வெளியேற்றினர்.

இவ்வாறு தண்ணீர் திறந்துவிடப்பட்டதைத் தொடர்ந்து, பிற்பகலுக்குப் பிறகு மூழ்கும் அபாயமுள்ள கிராமங்களில் நீரின் வரத்து படிப்படியாக அதிகரித்து வந்தது.

இந்நிலையில், மார்க்காபுரம் நகரைச் சேர்ந்த நாமாலா திருப்பதி நாயுடு (45), நல்லபோத்துல சீனு (40), பசுபுலேட்டி ரமணா (40) ஆகிய மூன்று பேரும், நீரில் மூழ்கவிருக்கும் கலனுட்டாலா கிராமத்தைக் கடைசியாகப் பார்ப்பதற்காக அங்கு சென்றனர்.

திங்கள்கிழமை மாலை 5 மணி அளவில் பொலிரோ வாகனத்தில் அவர்கள் ஊருக்குள் சென்றனர். ஏற்கெனவே கிராமத்தில் நீரோட்டம் அதிகமாக இருந்ததால், இரவு 7 மணியளவில் அவர்கள் திரும்பிச் செல்லத் தொடங்கினர்.

''திரும்பி வரும் வழியில் கலனுட்டாலா கிராமத்துக்கு அப்பால் உள்ள ஓடையைக் கடக்க முயன்றபோது, இரவு 7.30 மணியளவில் நீரோட்டத்தின் வேகம் திடீரென அதிகரித்தது. அந்த நீரோட்டத்தின் வேகத்தில் வாகனம் அடித்துச் செல்லப்பட்டபோது, அந்த மூவரும் வாகனத்திலிருந்து வெளியேறி நீரில் குதித்து, நீந்திக்கொண்டே அருகில் இருந்த மரத்தின் அருகில் சென்றனர்.

அங்கும் வெள்ளப்பெருக்கு மேலும் அதிகரித்ததால், அவர்கள் மரத்தின் மீது ஏறி கிளைகளைப் பிடித்துக்கொண்டு அமர்ந்து உதவிக்காகக் கூச்சலிட்டனர். ஓடையின் மறுகரையில் இருந்த உள்ளூர்வாசிகள் இதைக் கவனித்து உடனடியாக 100 என்ற அவசர உதவி எண்ணுக்குத் தொடர்பு கொண்டு தகவல் தெரிவித்தனர்'' என்று அதிகாரிகள் பிபிசிக்கு விளக்கினர்.

சுமார் 8 மணி நேரம் நீடித்த மீட்புப் பணி

காவல்துறையினர் சம்பவ இடத்துக்கு விரைந்தனர். மாவட்ட ஆட்சியர் விஜயா சுனிதா, இணை ஆட்சியர் புலி ஸ்ரீனிவாசலு மற்றும் மார்க்காபுரம் சட்டப்பேரவை தொகுதி உறுப்பினர் நாராயண ரெட்டியும் சம்பவ இடத்துக்கு வந்து, அந்த மூன்று பேரைக் காப்பாற்றும் வழிமுறைகள் குறித்து விவாதித்தனர்.

பெருமளவிலான காவல்துறையினரும் தீயணைப்பு வீரர்களும் வரவழைக்கப்பட்டனர். நீரின் பலத்த ஓட்டம் காரணமாக, அவர்களை அடைவதற்காக மின் கம்பங்களில் கயிறுகள் கட்டும் முயற்சிகள் மேற்கொள்ளப்பட்டன, ஆனால் அவை பலனளிக்கவில்லை.

இறுதியில், ஒரு கனரக இயந்திர வாகனமும், நீச்சல் வீரர்களும் வரவழைக்கப்பட்டு, அந்த மரத்துக்கு அருகில் வாகனம் கொண்டு செல்லப்பட்டது. அதன் மூலம் அவர்கள் மூவரும் மரத்திலிருந்து கீழே இறக்கப்பட்டனர். அங்கிருந்து அவர்கள் பாதுகாப்பாக ஆற்றங்கரைக்கு அழைத்து வரப்பட்டதாக, வருவாய் கோட்டாட்சியர் (ஆர்டிஓ) சிவராமி ரெட்டியும் டிஎஸ்பி நாகராஜும் பிபிசிக்குத் தெரிவித்தனர்.

அதிகாலை நான்கு மணியளவில் மீட்புப் பணி வெற்றிகரமாக நிறைவடைந்ததாகவும், இப்பணி எட்டு மணி நேரத்துக்கும் மேலாக நீடித்ததாகவும், இறுதியில் அவர்கள் அனைவரும் பத்திரமாக மீட்கப்பட்டதாகவும் மாவட்ட இணை ஆட்சியர் சீனிவாச ராவ் பிபிசிக்குத் தெரிவித்தார்.

மூழ்கும் கிராமத்தைப் பார்ப்பதற்காக மட்டுமா சென்றீர்கள்?

மார்க்காபுரத்தில் வீட்டு மனை மற்றும் நில விற்பனை தொழிலில் ஈடுபட்டுள்ள அந்த மூவரும், மூழ்கும் கிராமத்தைப் பார்ப்பதற்காகவே அங்கு சென்றதாகக் கூறுவதாகவும், இது குறித்து விசாரணை நடத்தி வருவதாகவும் டிஎஸ்பி நாகராஜு தெரிவித்தார். மேலும், பெத்தநாகலூரு (பெத்தஆவிடி) காவல் நிலையத்தில் அந்த மூன்று பேரிடமும் விசாரணை நடத்தப்பட்டு வருவதாகக் கூறினார்.

"அதிர்ஷ்டவசமாக மீட்புப் பணி வெற்றிகரமாக முடிந்தது, அதுவே போதும். இல்லையெனில், திட்டம் தொடங்கப்பட்ட முதல் நாளே பெரும் குழப்பத்தில் சிக்கியிருக்கும்" என்று மாவட்டத்தின் மூத்த அதிகாரி ஒருவர் பிபிசிக்குத் தெரிவித்தார்.

வாகனத்தில் ஐந்து பேர் இருந்ததாகவும், அவர்களில் இருவர் அடித்துச் செல்லப்பட்டதாகவும் இந்தச் சம்பவம் குறித்து பல வதந்திகள் பரவியுள்ளன என்றும், ஆனால் அவை அனைத்தும் உண்மையில்லை என்றும் டிஎஸ்பி நாகராஜு கூறினார்.

இருப்பினும், அந்த வாகனம் நீரோட்டத்தில் அடித்துச் செல்லப்பட்டது உண்மைதான் என்று அவர் உறுதிப்படுத்தினார்.

கோயில்களில் உள்ள நகைகளுக்காகவா?

"வெள்ளப் பாதிப்பு ஏற்பட்ட கிராமங்களில் மக்கள் வெளியேறியிருந்தாலும், கோயில்களில் இருந்த சிலைகளை அகற்ற வேண்டாம் என்று அப்படியே விட்டுச் சென்றனர். குறிப்பாக கலனூதலாவில் உள்ள வரலாற்றுச் சிறப்புமிக்க கோயில்களில், கடவுள் சிலைகளுக்கு அணிவிக்கப்பட்டிருந்த தங்க நகைகளையும் மத உணர்வின் காரணமாக அகற்றாமல் விட்டிருந்தனர். தற்போது அந்த நகைகளை திருடும் நோக்கில் சிலர் கிராமங்களுக்குள் சென்று வருகிறார்கள் என்ற குற்றச்சாட்டுகள் உள்ளன. அந்த கோணத்திலும் விசாரணை நடத்தி வருகிறோம்" என்று பெயர் தெரிவிக்க விரும்பாத காவல் அதிகாரி ஒருவர் பிபிசியிடம் தெரிவித்தார்.

இதற்கிடையில், வெள்ளப் பாதிப்பு ஏற்பட்ட கிராமங்களுக்குள் யாரும் செல்ல முடியாதவாறு திங்கள்கிழமை காலை முதலே கடுமையான பாதுகாப்பு நடவடிக்கைகள் எடுக்கப்பட்டிருந்ததாகவும், ஆனால் அந்த மூவரும் சென்ற அதே நேரத்தில் காவல்துறையினர் வேறு பணிக்காக அங்கிருந்து விலகிச் சென்றிருந்ததாகவும் பெத்தாரவீடு காவல் நிலைய உதவி ஆய்வாளர் சைதாபாபு பிபிசியிடம் தெரிவித்தார்.

இந்த மூவரும் செவ்வாய்க்கிழமை பிற்பகல் வரை காவல்துறையின் கண்காணிப்பில் இருந்ததால், அவர்களிடமிருந்து விளக்கம் பெற முடியவில்லை. அவர்கள் காவல் நிலையத்திலிருந்து வெளியே வந்த பிறகு தொடர்பு கிடைத்தால், அவர்களது கருத்துகளையும் இங்கே புதுப்பிப்போம். அதேபோல், அவர்களது குடும்ப உறுப்பினர்களிடமும் பேச முயற்சி செய்து வருகிறோம்.

இரவில் சிறிது நேரம் நீர் வெளியேற்றம் நிறுத்தப்பட்டது: இணை ஆட்சியர்

நீரோட்டத்தில் சிக்கியிருந்த மூவரை மீட்கும் முயற்சியின் ஒரு பகுதியாக, திங்கள்கிழமை இரவு சுமார் 11:30 மணியளவில் நீர் வெளியேற்றத்தை நிறுத்தியதாக மாவட்ட இணை ஆட்சியர் புலி ஸ்ரீநிவாசுலு பிபிசியிடம் தெரிவித்தார்.

உயர் அதிகாரிகளின் கவனத்துக்கு இந்த விவகாரத்தை கொண்டு சென்று, கொல்லம்வாகு ஹெட் ரெகுலேட்டரி பகுதியில் உள்ள மதகுகளை மூடி நீர் வெளியேற்றம் நிறுத்தப்பட்டதாகவும், பின்னர் அந்த மூவரையும் பாதுகாப்பாக மீட்டெடுத்த பிறகு மீண்டும் மதகுகள் திறக்கப்பட்டு வழக்கம்போல் நீர் வெளியேற்றம் நடைபெற்று வருவதாகவும் அவர் கூறினார்.

நீரோட்டம் குறைந்துள்ளது அல்லது மேலும் குறையும் என்று கருதி, வெள்ளப் பாதிப்பு ஏற்பட்ட கிராமங்களைச் சேர்ந்த மக்கள் யாரும் மீண்டும் தங்கள் கிராமங்களுக்குள் செல்ல வேண்டாம் என்றும் அவர் அறிவுறுத்தினார்.

மேலும், தங்களிடம் உள்ள தகவலின்படி திங்கள்கிழமை இரவுக்குள் வெள்ளப் பாதிப்பு ஏற்பட்ட கிராமங்களில் இருந்த அனைத்து இடம்பெயர்ந்த மக்களும் வெளியேறியிருந்ததாக இணை ஆட்சியர் ஸ்ரீநிவாசுலு பிபிசியிடம் தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு