Gall methiannau'r heddlu olygu 'risg sylweddol' i fywyd yn ôl crwner

Fe allai mwy o bobl farw ar fynyddoedd oni bai bod yr heddlu'n gwella'r ffordd y maen nhw'n delio â galwadau 999 sy'n cael eu datgysylltu meddai crwner.

Cafodd cyrff dau gerddwr ifanc o Norfolk, Eddie Hill, 20, a Jayden Long, 19, eu canfod yn farw ar Grib y Ddysgl yn Eryri ym mis Chwefror diwrnod ar ôl i alwad gan Mr Long gal ei ddatgysylltu.

Er i swyddogion geisio ei ffonio'n ôl, dywedodd y crwner cynorthwyol Sarah Riley mai ychydig iawn o ymdrechion pellach cafodd ei wneud i adnabod pwy oedd yn defnyddio'r ffôn.

Dywedodd hefyd ei fod wedi cymryd mwy na thair awr i roi gwybod i dimau achub mynydd am yr alwad.

Mae Heddlu Gogledd Cymru'n dweud eu bod wedi cymryd camau i gryfhau eu polisïau a'u gweithdrefnau.

Bu farw'r bechgyn ar ôl treulio noson mewn amodau gaeafol eithafol.

Dywedodd adroddiad allanol, 'A Prevention of Future Deaths' fod Mr Long wedi gwneud galwad 999 i Heddlu'r Gogledd am 16:27 ar 18 Chwefror.

Cafodd y cysylltiad ei golli ar ôl iddo ddweud "helo" ac "allwch chi fy nghlywed?".

Dywedodd y tîm achub mynydd wrth y cwest i farwolaethau'r bechgyn nad oedd ganddyn nhw ddigon o wybodaeth am y lleoliad na natur galwad 999 Mr Long er mwyn gallu ymateb yn syth.

Yn dilyn ymholiadau pellach, gan gynnwys cysylltu ag aelodau'r teuluoedd, aeth timau achub mynydd ati i chwilio o gwmpas y safle diwethaf i'r bechgyn cael eu gweld ond welon nhw ddim byd.

Fe benderfynon nhw barhau â'r chwilio y bore canlynol.

Daeth y gwasanaethau achub o hyd i gyrff y ddau ar 19 Chwefror, ddiwrnod ar ôl i'r alwad gael ei gwneud.

Mewn adroddiad i atal marwolaethau yn y dyfodol, nododd Ms Riley bryderon ynghylch diffyg canllawiau a hyfforddiant i staff sy'n delio â galwadau brys o ardaloedd mynyddig anghysbell, yn ogystal â diffyg trefniadau i rannu gwersi a ddysgwyd.

Dywedodd: "Os na chaiff y pryderon hyn eu datrys, mae perygl gwirioneddol y gallai mwy o bobl golli eu bywydau."

Mewn ymateb, dywedodd Heddlu'r Gogledd eu bod wedi diwygio gweithdrefnau eu canolfan gyfathrebu ers hynny.

Mae'r newidiadau'n cynnwys canllawiau penodol ar gyfer delio â galwadau 999 distaw neu alwadau sy'n cael eu datgysylltu mewn ardaloedd anghysbell neu fynyddig.

Dywedodd y llu hefyd fod newidiadau wedi'u rhoi ar waith yn sgil y digwyddiad, a bod y pryderon a gafodd eu nodi gan y crwner bellach wedi cael sylw.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.