Esther Rantzen: 'Dynes glên oedd yn brwydro a'n trio helpu pobl eraill'

Mae'r ddarlledwraig a'r ymgyrchydd y Fonesig Esther Rantzen wedi marw yn 86 oed. Roedd hi'n un o wynebau mwyaf cyfarwydd teledu Prydain wedi iddi gyflwyno'r rhaglen BBC That's Life am dros 20 mlynedd.

Mi wnaeth hefyd sefydlu Childline, sef gwasanaeth 24 awr yn rhoi cymorth i blant a phobl ifanc.

Yn y blynyddoedd diwethaf, ar ôl cael diagnosis o ganser yr ysgyfaint, daeth Esther Rantzen yn lais amlwg yn yr ymgyrch dros newid y gyfraith ar gymorth i farw.

Un sy' wedi ei chyfarfod hi yw Alun Clwyd Thomas fu'n rhoi teyrnged iddi ar Dros Frecwast ar Radio Cymru.

Mi wnaeth Alun gyfarfod ag Esther Rantzen pan oedd yn gweithio i BT yn 2004-5 wrth iddo gyflwyno siec iddi ar ran BT oedd yn rhoi adnoddau ar gyfer Childline am ddim.

Ond atgof cynharaf Alun ohoni yw gweld hi ar y teledu fel plentyn: "Pan o'n i'n blentyn yn y saithdegau, oedden ni'n mynd i dŷ nain bob nos Sadwrn.

"A holl bwynt y noson oedd That's Life. Fel teulu oedden ni i gyd yn eistedd yn barod i'w gwylio hi yn fyw.

"Oedd hi'n ddynes arbennig o neis, yn gwneud i fi deimlo'n gyfforddus iawn o'i chyfarfod hi y tro cyntaf.

"Halen y ddaear math o berson. O'n i'n teimlo'n agos ati yn syth ar ôl cyfarfod hi."

Yn 2016 mi wnaeth Alun gyfarfod ag Esther Rantzen eto yn annisgwyl iawn, fel mae'n sôn: "O'n i ym Mhrâg dros y flwyddyn newydd yn 2016 os dw i'n cofio'n iawn. Oedden ni yn y fynwent Iddewig ar ddiwrnod flwyddyn newydd - eira gwyn ac oer a diwrnod hyfryd.

"A wnes i deimlo rhywun yn rhoi llaw ar fy ysgwydd i a wnes i droi rownd a dywedodd hi, 'Hello, Alun.'

A o'n i jyst methu credu bod hi 'di cofio enw fi. Cawsom ni sgwrs sydyn ac oedd hi yno efo 'i merch yn mwynhau'r flwyddyn newydd ym Mhrâg."

Erbyn hyn mae Childline wedi helpu miliynau o blant drwy alwadau ffôn, sesiynau cwnsela ac adnoddau ar-lein.

Dywedodd Alun: "Roedd o'n bwysig iawn iddi. Mi oedd hi'n brwydro am flynyddoedd dros blant a sefydlu Childline yn 1986 er mwyn diogelu plant a bod nhw'n gallu ffonio am ddim.

"A hefyd, yn ddiddorol iawn, os oedd plentyn yn ffonio, byddai'r rhiant neu'r gofalwr neu'r aelod o'r teulu ddim yn gweld y rhif ar y bil.

"Roedd o'n neud o hyd yn oed mwy diogel i'r plentyn alw. Ac mae hi 'di neud cymaint o ddaioni o ran diogelwch pobl ifanc dros y blynyddoedd.

"Yn ddiweddar, [mi fydd yn cael ei chofio] am y salwch a roedd hi wedi talu i fynd i Dignitas, ond yn anffodus yn y diwedd roedd hi'n rhy sâl i fynd.

"Dw i'n meddwl [fydd hi'n] cael ei chofio fel dynes glên oedd yn brwydro a trio helpu pobl eraill."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.