Wane ne Sheikh Yahaya Masussuka da ƴan bindiga suka kashe?

Sheikh Yahya Masussuka, fitaccen malamin addinin Musulunci ne daga jihar Katsina, ya shafe sama da shekaru 30 yana wa'azi, tun yana ɗan shekara 13.

An haifi Sheikh Yahya Masussuka a ranar 19 ga Satumba, 1979, a ƙauyen Biyawa, da a wancan lokaci ke ƙarƙashin ƙaramar hukumar Batsari, kafin ya koma ƙaramar hukumar Dutsinma a jihar Katsina, arewa maso yammacin Najeriya.

Yana da mata biyu da 'ya'ya bakwai. Cikin a'yansa akwai Yusuf, wanda ake sa ran zai ci gaba da ayyukan da'awa na mahaifinsa ya bari.

Sheikh Masussuka ya yi karatu a wurare daban-daban, musamman a makarantun allo da tsangaya, kafin ya zarce zuwa jami'ar Al-Azhar da ke Masar, da kuma ƙasar Oman.

Ya yi karatu a hannun malamai da dama, ciki har da wasu fitattu kamar Sheikh Alhassan Lamido da Sheikh Malam Usman Dangungu na Kaduna.

Ya fara wa'azi ne yana da shekara 13, abin da ya sa ya shafe fiye da shekaru 30 yana koyar da addini, kamar yadda sakatarensa, Dr Mustapha Haruna ya tabbatar wa BBC.

A tsawon rayuwarsa, malamin ya fuskanci ƙalubale daban-daban a yayin gudanar da ayyukan da'awarsa, ciki har da ƙoƙarin kama shi da kuma kiransa da jami'an tsaro ke yi.

An kuma taɓa ɗaure shi na tsawon watanni tara a gidan yari a jihar Katsina kan wani lamari da ya shafi wa'azinsa.

Ya rasu ne bayan wasu 'yan bindiga sun harbe shi a kofar gidansa da ke yankin Dutsen-Ma, kamar yadda 'yan sanda suka tabbatar.

Za a gudanar da jana'izar Sheikh Yahya Masussuka ranar Juma'a, a cewar bayanan da aka bayar.

Martanin ƴansanda

Ita dai rundunar ‘yansandan Najeriya reshen jihar Katsina ta tabbatar da kisan sanannen malamin a gidansa da ke yankin Dutsen-Ma.

A wata tattaunawa da BBC, baturen ‘yansanda reshen Dutsen-Ma ya bayyana cewa wasu ‘yan bindiga ne suka kashe mashahurin malamin da yammacin Litinin a kofar gidansa.

CSP Auwalu Gwadabe ya ce malamin ya rasu ne sanadiyyar raunuka na harbin bindiga bayan an kai shi asibiti.

Shi kuwa daya daga cikin sanannun malaman da ke bin akida daya da Masussuka, wato Sheikh Usman Dangungu ya nuna kaduwarsa da kisan, inda yake cewa za su bar bincike ya bayyana wadanda suka aikata lamarin.

Kafin kisan nasa, Sheikh Masussuka na daga cikin malaman addinin Musulunci wadanda koyarwarsu ke haifar da cece-ku-ce a arewacin Najeriya da kasashe masu makwaftaka.

Malaman Musulunci da dama na sukar shi saboda akidarsa ta rashin yarda da hadisan Annabi Muhammad, inda yake danganta duk wata koyarwarsa ga Alqur’ani.

Lamarin ya kai ga cewa a cikin watan Nuwamban 2025 gwamnatin jihar Katsina ta yi sammacin malamin bisa zargin da aka yi masa na ‘cin zarafin malamai da kuma batanci ga hadisan Annabi Muhammad”.

Yadda aka kashe Sheikh Masussuka

Sanarwar da rundunar yansandan Najeriya a jihar Katsina ta fitar ta hannun mai magana da yawunta DSP Abubakar Aliyu ta ce an kashe Sheikh Masussuka ne da misalain karfe 7:30 na yamma a kofar gidansa da ke karamar hukumar Dutsen-Ma a jihar Katsina.

Sanarwar ta kara da cewa “wani harin ’yan bindiga ne ya yi ajalin malamin tare da wani abokinsa Adamu Abubakar”.

Sakataren Malamin ya ce Masussuka ya fita daga gida ne da nufin tafiya wurin da ya saba gudanar da karatunsa.

Sanarwar ‘yansanda ta ce jim kadan bayan faruwar lamarin ne aka garzaya da malamin da abokinsa zuwa wani asibiti da ke kusa, inda malaman asibitin suka tabbatar da rasuwar mutanen biyu.

Haka nan sanarwar ta kara da cewa kwamishinan ‘yansanda na jihar ya sanar da fara gudanar da bincike domin zakulo wadamda suka yi kisan.

Fahimtar Masussuka

Kamar yadda ba ya ɓoye fahimtarsa, Sheikh Masussuka mutum ne mabiyin fahimtar Ƙur'ani zalla, wani abu da ya sa yake yawan sukar hadisai da ya ce "suna taɓa ƙimar Annabi Muhammad SAW."

A baya ya yi suna da wata sara da yake kira da "Ritaya Dole", da ya ce ya ƙudiri aniyyar sanya wa koyarwar mabiya fahimtar "Salaf" ko kuma da ake kira Ahlussunnah, ko kuma ƴan ƙungiyar Izala, burki.

Wannan al'amari ne ake ganin ya ƙara rashin jituwar da ke tsakanin malamin da mabiya fahimtar Salaf ɗin inda suka yi ta musayar yawu a wa'azozinsu da soshiyal midiya.

Sheikh Masussuka na da gidan rediyo da talbijin da kuma makarantu a garin Dutsen-Ma na jihar Katsina, inda ya ce ya kafa su ne da manufar yaɗa koyarwar Alƙur'ani.

A watan Nuwamban 2025, gwamnatin jihar Katsina ta yi masa sammacin gurfana gaban hukumomi bisa zargin cin zarafin malamai da kuma batanci ga hadisai na Annabi Muhammad.