దేశవ్యాప్తంగా దసరా ఉత్సవాలు.. ఫోటోల్లో

భారత్‌లో అత్యంత వైభవంగా జరుపుకొనే హిందూ పండుగలలో ఒకటి దసరా.

దేశవ్యాప్తంగా లక్షల మంది ప్రజలు ఈ పండుగను దేవతల ఊరేగింపులతో, భక్తిశ్రద్ధలతో కూడిన పూజతో ఘనంగా నిర్వహిస్తారు.

చెడుపై మంచి సాధించిన విజయానికి ప్రతీకగా ఈరోజున భారీ దిష్టిబొమ్మలను దహనం చేస్తుంటారు.

ఈ పండుగను దేశంలోని వివిధ ప్రాంతాల్లో భిన్నమైన ఆచారాలు, సంప్రదాయాలతో జరుపుకుంటారు. అయితే, అన్ని చోట్లా ఈ పండుగెంతో వైభవంగా జరుగుతుంటుంది.

పౌరాణిక కథల ప్రకారం 10 తలల రాజు అయిన రావణాసురుడిపై శ్రీరాముడు సాధించిన విజయానికి ప్రతీకగా.. అధర్మంపై ధర్మం సాధించిన గెలుపునకు సంకేతంగా ఈ పండుగను చూస్తారు.

ఈ పండుగ విజయదశమి రోజునే వస్తుంది. మహిషాసురుడనే రాక్షసుడిని సంహరించినందుకు గుర్తుగా భారత్‌లోని తూర్పు, దక్షిణ, ఇతర ప్రాంతాలలో విజయదశమిని జరుపుకొంటారు.

హిందువులు చంద్రమాన క్యాలెండర్‌ను అనుసరిస్తారు. నవరాత్రి అనే తొమ్మిది రాత్రుల పూజా వేడుకలు ముగిసిన తర్వాత వచ్చే పదవ రోజున దసరా పండుగ నిర్వహిస్తారు.

ఉత్తర భారత్‌లో దసరా పండుగకు ముందు రోజుల్లో, కళాకారులు ప్రత్యేకమైన వేషధారణలు, అలంకరణలతో 'రామ్‌లీల'ను ప్రదర్శిస్తారు. ఇది ప్రాచీన హిందూ ఇతిహాసమైన రామాయణాన్ని నాటక రూపంలో తెలియజేస్తుంది.

ఇందులో శ్రీరాముని వనవాసం, రావణునిచే సీతాదేవి అపహరణ, చివరగా చెడుపై మంచి సాధించిన విజయానికి ప్రతీకగా జరిగే యుద్ధం వంటి ఘట్టాలను ప్రదర్శిస్తారు.

ఈ నాటకం ముగిసిన తర్వాత, రావణుడు, ఆయన సోదరుడు కుంభకర్ణుడు, కుమారుడు మేఘనాథుల దిష్టిబొమ్మలను దహనం చేసే ఆచారం ఉంటుంది.

తూర్పు ప్రాంతాల్లోనూ, మరికొన్ని ఇతర చోట్లా, అలాగే బంగ్లాదేశ్‌లోని హిందువులు, ఈ పండుగ సందర్భంగా 'దుర్గా పూజ' ద్వారా దైవిక స్త్రీ శక్తిని ఆరాధిస్తారు.

పట్టణాలు, నగరాల్లో దుర్గాదేవి, ఇతర దేవతల విగ్రహాలను ఉంచడానికి తాత్కాలిక మండపాలను ఏర్పాటు చేస్తారు. ప్రజలు ఈ మండపాలను సందర్శిస్తారు. వీటిలో మహిషాసురుడనే రాక్షసుడిని దుర్గా దేవి సంహరిస్తున్న దృశ్యాలను ప్రదర్శిస్తుంటారు.

దుర్గా పూజ వేడుకలకు ప్రసిద్ధి చెందిన కోల్‌కతా నగరంలో, సాంప్రదాయ వేడుకలలోకి సమకాలీన విషయాలు తరచుగా వస్తుంటాయి. ఉదాహరణకు, అక్కడ గుడారాలను థీమ్ ఆధారంగా అలంకరిస్తారు.

20 రోజుల తర్వాత వచ్చే దీపాల పండుగ దీపావళికి సన్నాహాలు కూడా దసరాతోనే మొదలవుతాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)