అభిషేక్ శర్మ తుపాన్ బ్యాటింగ్, న్యూజీలాండ్‌పై 35 బంతుల్లోనే సెంచరీ.. 6 వికెట్లతో భారత్ గెలుపు
ఫొటో సోర్స్, Getty Images
న్యూజీలాండ్‌తో జరిగిన మూడో టీ20 మ్యాచ్‌లో భారత ఓపెనర్ అభిషేక్ శర్మ తుపాన్ ఇన్నింగ్స్‌తో చెలరేగాడు.
అభిషేక్ శర్మ ధాటికి భారత్ మరో 40 బంతులు మిగిలి ఉండగానే 6 వికెట్ల తేడాతో విజయం సాధించింది.
5 మ్యాచ్‌ల ఈ టీ20 సిరీస్‌లో భారత్ 3-0తో ముందంజలో ఉంది.
వెల్లింగ్టన్‌లో జరిగిన ఈ మూడో టీ20లో అభిషేక్ శర్మ 11 సిక్సర్లు, 9 ఫోర్లతో 35 బంతుల్లోనే సెంచరీ చేశాడు.
గతంలో అఫ్గానిస్తాన్‌పై 30 బంతుల్లోనే సెంచరీ చేసిన అభిషేక్ .. ఐసీసీ ఫుల్ మెంబర్ దేశాల బ్యాటర్లలో అత్యంత వేగంగా సెంచరీ చేసిన ఆటగాడిగా రికార్డు సృష్టించాడు.
అంతకుముందు, వైభవ్ సూర్యవంశీ 19 బంతుల్లో 45 పరుగులు చేసి అవుట్ అయ్యాడు.
ఫొటో సోర్స్, Getty Images
అభిషేక్ శర్మ రికార్డులు
అంతర్జాతీయ టీ20 క్రికెట్‌లో 2000 కంటే ఎక్కువ పరుగులు చేసిన బ్యాటర్లలో అభిషేక్ శర్మ 193.36 స్ట్రయిక్ రేట్‌తో మొదటి స్థానంలో ఉన్నాడు.
ప్రపంచంలోనే అంతర్జాతీయ టీ20ల్లో పవర్‌ప్లేలో 100 సిక్సర్లు కొట్టిన తొలి బ్యాటర్‌గా కూడా రికార్డు సృష్టించాడు. ఈ విషయంలో అతను రోహిత్ శర్మను వెనక్కి నెట్టాడు. రోహిత్ శర్మ పవర్‌ప్లేలో 98 సిక్సర్లు కొట్టాడు.
ఓపెనర్‌గా అంతర్జాతీయ టీ20ల్లో 1000 పరుగులు చేసి మొట్టమొదటి భారత బ్యాటర్‌గా అభిషేక్ శర్మ 2026లో ఘనత సాధించాడు. అలాగే, కేవలం 1024 బంతుల్లోనే 2,000 అంతర్జాతీయ టీ20 పరుగులు పూర్తి చేసి ప్రపంచ రికార్డు సృష్టించాడు. అంతకుముందు ఈ రికార్డు సూర్యకుమార్ యాదవ్ పేరు మీద ఉండేది. ఈ మైలురాయిని చేరుకోవడానికి యాదవ్ 1,164 బంతులు ఆడాడు.
ఆకట్టుకున్న డరైల్ మిచెల్..
ఇక వెల్లింగ్టన్ మ్యాచ్ విషయానికి వస్తే... ఈ మ్యాచ్‌లో టాస్ ఓడి ముందుగా బ్యాటింగ్ చేసిన న్యూజీలాండ్ 20 ఓవర్లలో మూడు వికెట్ల నష్టానికి 198 పరుగులు చేసింది.
డరైల్ మిచెల్ 52 బంతుల్లో 5 ఫోర్లు, 5 సిక్సర్లతో 89 పరుగులు చేశాడు. ఫిన్ అలెన్ 40 పరుగులతో మిచెల్‌కు సహకారాన్ని అందించాడు.
భారత బౌలర్లలో అర్ష్‌దీప్ సింగ్, అక్షర్ పటేల్, నితీష్ కుమార్ రెడ్డి తలా ఓ వికెట్ తీశారు.
ప్రిన్స్ యాదవ్ 44 పరుగులు ఇచ్చాడు.
ఫొటో సోర్స్, Getty Images
13.2 ఓవర్లలోనే మ్యాచ్ ఫినిష్..
199 పరుగుల లక్ష్యఛేదనకు బరిలోకి దిగిన భారత్ 13.2 ఓవర్లలోనే 4 వికెట్లు కోల్పోయి విజయాన్ని అందుకుంది.
అభిషేక్ శర్మ వేగంగా సెంచరీ చేయగా, వైభవ్ సూర్యవంశీ 19 బంతుల్లో 4 ఫోర్లు, 4 సిక్సర్లతో ధాటిగా ఆడాడు.
సంజూ శాంసన్ 18 పరుగులు, కెప్టెన్ శ్రేయస్ అయ్యర్ 5 పరుగులు చేశారు.
న్యూజీలాండ్ బౌలర్లలో కైల్ జేమీసన్ 2, మాథ్యూ ఫిషర్, మిచెల్ శాంట్నర్ తలా ఓ వికెట్ తీశారు.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)
